حضرت حسن سے سوال کیا گیا کہ اگر ایک آدمی اپنی بیوی کو طلاق دے اور کوئی غلام اپنے آقا کی اجازت کے بغیر اس سے شادی کرلے اور شرعی ملاقات بھی کرلے تو کیا وہ پہلے خاوند کے لئے حلال ہوجائے گی؟ حضرت حسن نے فرمایا کہ یہ اس کا خاوند نہیں ہے۔ یعنی وہ پہلے خاوند کے لئے حلال نہیں ہوگی۔ [مصنف ابن ابي شيبه/كتاب النكاح/حدیث: 16811]

حضرت شعبی سے بھی یہی منقول ہے۔ البتہ حضرت حکم فرماتے ہیں کہ یہ غلام اس کا خاوندبن گیا۔ اب وہ پہلے خاوند سے نکاح کرسکتی ہے۔ [مصنف ابن ابي شيبه/كتاب النكاح/حدیث: 16812]

حضرت عطاء سے سوال کیا گیا کہ اگر ایک آدمی اپنی بیوی کو تین طلاق دے اور کوئی غلام اپنے آقا کی اجازت کے بغیر اس سے شادی کرلے تو کیا وہ پہلے خاوند کے لئے حلال ہوجائے گی؟ انہوں نے فرمایا کہ یہ نکاح درست نہیں، لہٰذا وہ پہلے خاوند سے نکاح نہیں کرسکتی۔ [مصنف ابن ابي شيبه/كتاب النكاح/حدیث: 16814]

حضرت ابراہیم فرماتے ہیں کہ وہ پہلے خاوند سے نکاح نہیں کرسکتی، کیونکہ نکاح درست نہیں۔ [مصنف ابن ابي شيبه/كتاب النكاح/حدیث: 16815]

حضرت حماد فرماتے ہیں کہ وہ اس وقت تک پہلے خاوند سے نکاح نہیں کرسکتی جب تک مسلمانوں والا جائز نکاح نہ کرلے۔ [مصنف ابن ابي شيبه/كتاب النكاح/حدیث: 16816]

حضرت طاوس فرماتے ہیں کہ غیر شرعی نکاح سے عورت پہلے خاوند کے لئے حلال نہیں ہوتی۔ [مصنف ابن ابي شيبه/كتاب النكاح/حدیث: 16817]

حضرت عامر فرماتے ہیں کہ غلام اور خصی بہر حال زوج ہیں۔ [مصنف ابن ابي شيبه/كتاب النكاح/حدیث: 16818]