حضرت جریر رحمہ اللہ فرماتے ہیں کہ میں نے رسول اللہ صلی اللہ علیہ وسلم سے اچانک پڑجانے والی نظر کے بارے میں سوال کیا تو آپ نے فرمایا کہ اپنی نگاہ کو پھیر لو۔ [مصنف ابن ابي شيبه/كتاب النكاح/حدیث: 18101]

حضرت علاء بن زیاد رحمہ اللہ فرماتے ہیں کہ کہا جاتا تھا کہ اپنی نظر کو کسی عورت کی چادر کے حسن پر بھی مت ڈالو کیونکہ نظر دل میں خواہش کو بیدار کرتی ہے۔ [مصنف ابن ابي شيبه/كتاب النكاح/حدیث: 18102]

حضرت عاصم احول رحمہ اللہ فرماتے ہیں کہ ایک مرتبہ حضرت شعبی رحمہ اللہ نے قرآن مجید کی آیت پڑھی: مومنین سے کہہ دو کہ اپنی نگاہوں کو جھکائیں۔ میں نے حضرت شعبی رحمہ اللہ سے کہا کہ آدمی کسی عورت کو دیکھتا ہے لیکن اس کی حرام کردہ چیزوں کو نہیں دیکھتا تو کیا حکم ہے؟ انہوں نے فرمایا کہ کیا تم اپنی آنکھوں سے اس میں سوراخ کرنا چاہتے ہو؟ [مصنف ابن ابي شيبه/كتاب النكاح/حدیث: 18103]

حضرت عطاء رحمہ اللہ فرماتے ہیں کہ وہ نظر جو دل میں خواہش کو بیدار کرے اس میں کوئی خیر نہیں۔ [مصنف ابن ابي شيبه/كتاب النكاح/حدیث: 18104]

حضرت بریدہ رضی اللہ عنہ فرماتے ہیں کہ حضور 5 نے حضرت علی رضی اللہ عنہ کو نصیحت فرمائی کہ ایک نظر پڑجائے تو دوسری نہ ڈالو، کیونکہ پہلی نظر میں تو گنجائش ہے لیکن دوسری میں تمہارے لئے گنجائش نہیں۔ [مصنف ابن ابي شيبه/كتاب النكاح/حدیث: 18105]

حضرت موسیٰ جہنی رحمہ اللہ کہتے ہیں کہ میں ایک راستے میں حضرت سعید بن جبیر رحمہ اللہ کے ساتھ تھا۔ ہمارے سامنے ایک عورت یا لڑکی آئی تو ہم سب کی نگاہ اس پر پڑگئی، پھر حضرت سعید نے نگاہ جھکا لی لیکن میں دیکھتا رہا، مجھ سے حضرت سعید نے فرمایا کہ پہلی نظر میں پکڑ نہیں لیکن دوسری میں پکڑ ہے۔ [مصنف ابن ابي شيبه/كتاب النكاح/حدیث: 18106]

حضرت قیس رحمہ اللہ فرماتے ہیں کہ پہلی نظر پر گرفت نہیں لیکن اگر کوئی دیکھتا ہی رہے تو قابل گرفت ہے۔ [مصنف ابن ابي شيبه/كتاب النكاح/حدیث: 18107]

حضرت ابو ہیثم رحمہ اللہ فرماتے ہیں کہ ایک آدمی نے حضرت ابن سیرین رحمہ اللہ سے سوال کیا کہ اگر میرے سامنے کوئی عورت راستے میں آجائے اور میں اس سے نگاہ پھیرلوں تو کیا مجھے گناہ ملے گا؟ انہوں نے فرمایا کہ کیا قرآن نہیں پڑھتے؟ اللہ تعالیٰ فرماتے ہیں کہ اہل ایمان سے کہو کہ اپنی نگاہیں نیچی رکھیں، اور اللہ تعالیٰ فرماتے ہیں کہ اللہ آنکھوں کی خیانت کو جانتا ہے۔ [مصنف ابن ابي شيبه/كتاب النكاح/حدیث: 18108]

حضرت انس رضی اللہ عنہ فرماتے ہیں کہ جب تمہارا کسی عورت سے سامنا ہو تو اس کے گذرنے تک اپنی نگاہ کو جھکا کررکھو۔ [مصنف ابن ابي شيبه/كتاب النكاح/حدیث: 18109]

حضرت ابو قلابہ رحمہ اللہ فرماتے ہیں کہ تمہیں عورت کا حسن کوئی نقصان نہ دے گا جب تک تم اسے پہچان نہ لو۔ [مصنف ابن ابي شيبه/كتاب النكاح/حدیث: 18110]