حضرت مغیرہ فرماتے ہیں کہ حضرت ابراہیم نے اللہ رب العزت کے اس قول کے مطابق: ترجمہ: اور وہ لوگ جب خرچ ہیں تو نہ اسراف کرتے ہیں اور نہ بخل کرتے ہیں اور ہوتا ہے ان کا خرچ کرنا ان دونوں کے درمیان اعتدال سے۔ آپ نے فرمایا: نہ وہ ان کو بھوکا رکھتے ہیں اور نہ ان کو لباس سے محروم کرتے ہیں اور نہ ہی ایسے طور پر خرچ کرتے ہیں کہ لوگ کہنے لگے کہ اس نے اس معاملہ میں فضول خرچی کی۔ [مصنف ابن ابي شيبه/ كتاب الأدب/حدیث: 28297]

حضرت منھال فرماتے ہیں کہ حضرت سعید بن جبیر نے اللہ رب العزت کے اس قول کے مطابق: ”اور جو خرچ کردیتے ہو تم کوئی بھی چیز تو وہ اس کی جگہ اور دیتا ہے تم کو اور وہ سب سے بہتر رزق عطا فرمانے والا ہے۔“ آپ نے فرمایا: یہ صورت اسراف اور کنجوسی کے علاوہ میں ہے۔ [مصنف ابن ابي شيبه/ كتاب الأدب/حدیث: 28298]

حضرت یحییٰ بن جزار فرماتے ہیں کہ حضرت ابو العبید ین نے حضرت ابن مسعود سے فضول خرچی کے متعلق پوچھا: تو آپ نے فرمایا: مال کو حق کے علاوہ جگہ میں خرچ کرنا فضول خرچی ہے۔ [مصنف ابن ابي شيبه/ كتاب الأدب/حدیث: 28299]

حضرت داؤد فرماتے ہیں کہ میں نے حضرت حسن بصری سے پوچھا: کہ میں نے سال میں اپنی بیوی کے لیے بیس درہم کی خوشبو خریدی کیا یہ اسراف ہے؟ آپ نے فرمایا: یہ اسراف نہیں ہے۔ [مصنف ابن ابي شيبه/ كتاب الأدب/حدیث: 28300]

حضرت طاؤس فرماتے ہیں کہ حضرت ابن عباس رضی اللہ عنہما نے ارشاد فرمایا: جو چاہو پہنو اور جو چاہو کھاؤ۔ لیکن دو عادتوں سے بچنا ایک فضول خرچی اور دوسری فخر۔ [مصنف ابن ابي شيبه/ كتاب الأدب/حدیث: 28301]

حضرت محمد بن سوقہ فرماتے ہیں کہ حضرت سعید بن جبیر سے کسی آدمی نے مال ضائع کرنے کے متعلق پوچھا؟ آپ نے فرمایا: مال ضائع کرنا یہ ہے کہ اللہ رب العزت تجھے رزق عطا کریں اور تم اس کو ان کاموں میں خرچ کرو جو اللہ نے تم پر حرام کیے ہیں۔ [مصنف ابن ابي شيبه/ كتاب الأدب/حدیث: 28302]

حضرت عوام فرماتے ہیں کہ حضرت کعب نے ارشاد فرمایا: خرچ کرو، اس کا بدل تمہیں مل جائے گا۔ [مصنف ابن ابي شيبه/ كتاب الأدب/حدیث: 28303]

حضرت عبد اللہ بن مسعود رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: جس نے میانہ روی کی وہ محتاج نہیں ہوا۔ [مصنف ابن ابي شيبه/ كتاب الأدب/حدیث: 28304]

حضرت یوسف فرماتے ہیں کہ حضرت ابو السریہ بن حسن نے ارشاد فرمایا: کھانے میں اسراف نہیں ہے۔ [مصنف ابن ابي شيبه/ كتاب الأدب/حدیث: 28305]

حضرت حسن بصری فرماتے ہیں کہ رسول اللہ صلی اللہ علیہ وآلہ وسلم کے صحابہ نے آپ صلی اللہ علیہ وآلہ وسلم سے سوال کیا کہ جو ہم اپنے گھر والوں پر خرچ کرتے ہیں اس کی کیا حیثیت ہے؟ آپ صلی اللہ علیہ وآلہ وسلم نے فرمایا: جو مال تم اپنے گھر والوں پر بغیر اسراف اور بغیر کنجوسی کے خرچ کرتے ہو وہ اللہ کے راستہ میں شمار ہوتا ہے۔ [مصنف ابن ابي شيبه/ كتاب الأدب/حدیث: 28306]