حضرت ابن ابی نجیح فرماتے ہیں کہ حضرت مجاھد سے آیت ”اور چاہیے کہ ان کی سزا کا مشاہدہ کرے مومنوں کا ایک گروہ۔“ کی تفسیر میں مروی ہے آپ نے فرمایا: کم از کم ایک آدمی ہو، اور حضرت عطاء نے فرمایا: دو آدمی ہوں۔ [مصنف ابن ابي شيبه/كتاب الحدود/حدیث: 30633]

حضرت ہشام فرماتے ہیں کہ حضرت حسن بصری سے آیت { وَلْیَشْہَدْ عَذَابَہُمَا طَائِفَۃٌ مِنَ الْمُؤْمِنِینَ } کی تفسیر یوں مروی ہے آپ نے فرمایا: دس افراد ہوں۔ [مصنف ابن ابي شيبه/كتاب الحدود/حدیث: 30635]

حضرت ابن ابی ذئب فرماتے ہیں کہ حضرت زھری نے ارشاد فرمایا: تین یا اس سے زائد ہوں۔ [مصنف ابن ابي شيبه/كتاب الحدود/حدیث: 30636]

حضرت اشعث کے والد حضرت سوار فرماتے ہیں کہ میں حضرت ابو برزہ کے پاس حاضر تھا۔ آپ نے اپنی ایک باندی کو کوڑے مارے جس نے زنا کیا تھا۔ درآنحالیکہ اس نے چادر پہنی ہوئی تھی جس نے اس کو ڈھانپا ہوا تھا۔ اور آپ کے پاس لوگوں کا ایک گروہ تھا پھر آپ نے آیت پڑھی: ترجمہ:۔ اور چاہیے کہ مشاہدہ کرے ان کی سزا کا مسلمانوں کا ایک گروہ۔ [مصنف ابن ابي شيبه/كتاب الحدود/حدیث: 30637]

حضرت موسیٰ بن عبیدہ فرماتے ہیں کہ میں نے حضرت محمد بن کعب کو ارشاد فرماتے ہوئے سنا: آیت: ترجمہ:۔ اگر معاف کر بھی دیا جائے تم میں سے ایک گروہ کو۔ آپ نے فرمایا: و ہ ایک آدمی تھا۔ [مصنف ابن ابي شيبه/كتاب الحدود/حدیث: 30638]