حضرت ابن عباس رضی اللہ عنہما سے ارشادِ خداوندی (فَاتَّقُوا اللَّہَ وَأَصْلِحُوا ذَاتَ بَیْنِکُمْ) کے بارے میں روایت ہے کہ انہوں نے فرمایا: یہ خدا کی طرف سے ایمان والوں پر لازم ہے کہ وہ تقویٰ اختیار کریں اور آپس میں صلح صفائی رکھیں۔ [مصنف ابن ابي شيبه/كتاب الزهد/حدیث: 37507]

حضرت ابن عباس رضی اللہ عنہما سے روایت ہے کہ اللہ تعالیٰ نے قرآن کی اتباع کرنے والے کے لیے اس بات کی ضمانت دی ہے کہ وہ دنیا میں گمراہ نہ ہوگا اور آخرت میں شقی نہ بنے گا۔ پھر آپ رضی اللہ عنہ نے تلاوت فرمائی: { فَمَنِ اتَّبَعَ ہُدَایَ فَلاَ یَضِلُّ وَلاَ یَشْقَی }۔ [مصنف ابن ابي شيبه/كتاب الزهد/حدیث: 37508]

حضرت ابن عباس رضی اللہ عنہما سے ارشادِ خداوندی { تَوَفَّتْہُ رُسُلُنَا وَہُمْ لاَ یُفَرِّطُونَ } کے بارے میں روایت ہے وہ کہتے ہیں کہ یہ ملک الموت کے معاونین فرشتے ہیں۔ [مصنف ابن ابي شيبه/كتاب الزهد/حدیث: 37509]

حضرت ابن عباس رضی اللہ عنہما سے {إذَا وَقَعَتِ الْوَاقِعَۃُ } کے بارے میں روایت ہے فرمایا: یہ قیامت کا دن ہے۔ { لَیْسَ لِوَقْعَتِہَا کَاذِبَۃٌ خَافِضَۃٌ رَافِعَۃٌ} فرمایا: کچھ لوگوں کو بلند کرے گی اور کچھ لوگوں کو پست کرے گی۔ [مصنف ابن ابي شيبه/كتاب الزهد/حدیث: 37510]

حضرت ابن عباس رضی اللہ عنہما سے {إنَّ الْحَسَنَاتِ یُذْہِبْنَ السَّیِّئَاتِ } کے بارے میں منقول ہے۔ فرمایا: یہ پانچ نمازیں ہیں۔ [مصنف ابن ابي شيبه/كتاب الزهد/حدیث: 37511]

حضرت ابن عباس رضی اللہ عنہما سے روایت ہے وہ کہتے ہیں کہ زمین بندہ مومن پر چالیس دن روتی ہے۔ [مصنف ابن ابي شيبه/كتاب الزهد/حدیث: 37512]

حضرت ابن عباس رضی اللہ عنہما سے روایت ہے وہ کہتے ہیں کہ جو شخص ریا کاری کرتا ہے تو اللہ تعالیٰ بھی اس کے ساتھ دکھلاوا کرتے ہیں۔ [مصنف ابن ابي شيبه/كتاب الزهد/حدیث: 37513]

حضرت ابن عباس رضی اللہ عنہما سے { سَیَجْعَلُ لَہُمُ الرَّحْمَن وُدًّا } کے بارے میں روایت ہے۔ فرمایا: ان سے خدا محبت کرتا ہے اور ان کو (لوگوں کا) محبوب بنا دیتا ہے۔ [مصنف ابن ابي شيبه/كتاب الزهد/حدیث: 37514]

حضرت ابن عباس رضی اللہ عنہما سے روایت ہے وہ کہتے ہیں کہ ابن آدم کے تینتیس اعضاء ہیں اور اس کے ہر عضو پر خدا کی تسبیح، تحمید اور ذکر کی زکوٰۃ ہے۔ [مصنف ابن ابي شيبه/كتاب الزهد/حدیث: 37515]

حضرت ابن عباس رضی اللہ عنہما سے { لِکَیْلاَ تَأْسَوْا عَلَی مَا فَاتَکُمْ وَلاَ تَفْرَحُوا بِمَا آتَاکُمْ } کے بارے میں روایت ہے کہ انہوں نے فرمایا: ہر آدمی خوش ہوتا ہے اور غمگین ہوتا ہے لیکن جس نے مصیبت کو صبر کرلیا اور خیر کو شکر کرلیا۔ [مصنف ابن ابي شيبه/كتاب الزهد/حدیث: 37516]