عمرو شیبانی بیان کرتے ہیں: ہمیں اس گھر کے مالک نے، انہوں نے سیدنا عبداللہ بن مسعود رضی اللہ عنہ کے گھر کی طرف اشارہ کرتے ہوئے یہ بات کہی ہے، لیکن ان کا نام نہیں لیا، یہ بات بیان کی ہے: میں نے نبی کریم صلی اللہ علیہ وسلم سے دریافت کیا: ”کون سا عمل زیادہ فضیلت رکھتا ہے؟“ آپ صلی اللہ علیہ وسلم نے ارشاد فرمایا: ”نماز کو اس کے ابتدائی وقت میں ادا کرنا۔“ میں نے عرض کیا: ”پھر کون سا؟“ آپ نے فرمایا: ”اللہ کی راہ میں جہاد کرنا۔“ میں نے دریافت کیا: ”پھر کون سا؟“ آپ نے فرمایا: ”والدین کے ساتھ حسن سلوک کرنا۔“ (سیدنا عبداللہ رضی اللہ عنہ فرماتے ہیں) اگر میں آپ سے مزید دریافت کرتا تو آپ مجھے مزید جواب عطا کرتے۔ [سنن الدارقطني/ كِتَابُ الصَّلَاةِ/حدیث: 967]

ابوعمرو شیبانی، نبی کریم صلی اللہ علیہ وسلم کے ایک صحابی کے حوالے سے یہ بات نقل کرتے ہیں: نبی کریم صلی اللہ علیہ وسلم سے سوال کیا گیا: ”کون سا عمل زیادہ فضیلت رکھتا ہے؟“ تو آپ نے فرمایا: ”سب سے زیادہ فضیلت والا عمل، نماز کو اس کے وقت پر ادا کرنا ہے۔“ ایک روایت میں یہ الفاظ ہیں: ”نماز اس کے ابتدائی وقت پر ادا کرنا ہے۔“ [سنن الدارقطني/ كِتَابُ الصَّلَاةِ/حدیث: 968]

ابوعمرو شیبانی بیان کرتے ہیں: اس گھر کے مالک نے مجھے یہ حدیث سنائی ہے، ان کی مراد سیدنا عبداللہ بن مسعود رضی اللہ عنہ ہیں۔ وہ فرماتے ہیں: میں نے نبی کریم صلی اللہ علیہ وسلم سے سوال کیا، میں نے عرض کی: ”کون سا عمل زیادہ فضیلت رکھتا ہے؟“ تو آپ نے ارشاد فرمایا: ”نماز کو اس کے ابتدائی وقت میں ادا کرنا۔“ [سنن الدارقطني/ كِتَابُ الصَّلَاةِ/حدیث: 969]

سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”بہترین عمل نماز کو اس کے ابتدائی وقت میں ادا کرنا ہے۔“ [سنن الدارقطني/ كِتَابُ الصَّلَاةِ/حدیث: 970]

سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ وسلم سے سوال کیا گیا: ”کون سا عمل زیادہ فضیلت رکھتا ہے؟“ تو آپ نے ارشاد فرمایا: ”نماز کو اس کے ابتدائی وقت میں ادا کرنا۔“ محدثین کی ایک جماعت نے اس کے برخلاف نقل کیا ہے۔ [سنن الدارقطني/ كِتَابُ الصَّلَاةِ/حدیث: 971]

سیدہ ام فروہ رضی اللہ عنہا بیان کرتی ہیں: انہوں نے نبی کریم صلی اللہ علیہ وسلم کو یہ ارشاد فرماتے ہوئے سنا ہے: ”اللہ تعالیٰ کے نزدیک سب سے زیادہ فضیلت والا عمل یہ ہے کہ نماز کو اس کے ابتدائی وقت میں ادا کر لیا جائے۔“ [سنن الدارقطني/ كِتَابُ الصَّلَاةِ/حدیث: 972]

سیدہ ام فروہ رضی اللہ عنہا بیان کرتی ہیں: میں نے نبی کریم صلی اللہ علیہ وسلم سے دریافت کیا: ”کون سا عمل زیادہ فضیلت رکھتا ہے؟“ تو آپ نے ارشاد فرمایا: ”نماز کو اس کے ابتدائی وقت میں ادا کر لینا۔“ [سنن الدارقطني/ كِتَابُ الصَّلَاةِ/حدیث: 973]

یہی روایت ایک اور سند کے ہمراہ منقول ہے تاہم اس میں یہ بات بھی مذکور ہے: سیدہ ام فروہ رضی اللہ عنہا ان خواتین میں سے ایک ہیں جنہوں نے درخت کے نیچے نبی کریم صلی اللہ علیہ وسلم کے دست اقدس پر بیعت کی تھی۔ [سنن الدارقطني/ كِتَابُ الصَّلَاةِ/حدیث: 974]

سیدہ ام فروہ رضی اللہ عنہا جو ان خواتین میں سے ہیں جنہوں نے نبی کریم صلی اللہ علیہ وسلم کے دست اقدس پر اسلام قبول کیا تھا، وہ بیان کرتی ہیں: میں نے ایک دن نبی کریم صلی اللہ علیہ وسلم کو اعمال کا تذکرہ کرتے ہوئے سنا آپ نے ارشاد فرمایا: ”اللہ کے نزدیک سب سے زیادہ پسندیدہ عمل نماز کو اس کے ابتدائی وقت میں ادا کرنا ہے۔“ [سنن الدارقطني/ كِتَابُ الصَّلَاةِ/حدیث: 975]

سیدہ ام فروہ رضی اللہ عنہا بیان کرتی ہیں: نبی کریم صلی اللہ علیہ وسلم سے سوال کیا گیا، میں یہ بات سن رہی تھی آپ صلی اللہ علیہ وسلم سے سب سے زیادہ فضیلت والے عمل کے بارے میں دریافت کیا گیا، تو آپ صلی اللہ علیہ وسلم نے ارشاد فرمایا: ”نماز کو اس کے ابتدائی وقت میں ادا کرنا ہے۔“ [سنن الدارقطني/ كِتَابُ الصَّلَاةِ/حدیث: 976]