سیدنا ثوبان رضی اللہ عنہ بیان کرتے ہیں: نبی کریم صلی اللہ علیہ وسلم نے روزہ رکھا ہوا تھا، یہ رمضان کے روزوں کی بات نہیں ہے، آپ کو کوئی پریشانی لاحق ہوئی، جو آپ کے لیے تکلیف دہ ہوئی، تو آپ کو قے آ گئی، پھر آپ نے وضو کے لیے پانی منگوایا، آپ نے وضو کیا اور روزہ توڑ دیا۔ میں نے عرض کی: یا رسول اللہ! کیا قے کرنے کے بعد وضو کرنا فرض ہے؟ آپ صلی اللہ علیہ وسلم نے ارشاد فرمایا: ”اگر یہ فرض ہوتا، تو تم اسے قرآن میں پا لیتے۔“ راوی بیان کرتے ہیں: اس کے بعد نبی کریم صلی اللہ علیہ وسلم نے اگلے دن روزہ رکھا، تو میں نے آپ کو یہ ارشاد فرماتے ہوئے سنا: ”یہ میرے گزشتہ دن کا روزے توڑنے کے بدلے میں ہے۔“ اس روایت کا راوی عتبہ بن سکن متروک الحدیث ہے۔ [سنن الدارقطني/ كِتَابُ الصِّيَامِ/حدیث: 2272]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”جو شخص جان بوجھ کر قے کر لے، تو اس پر قضاء لازم ہو گی اور جس شخص کو قے آ جائے، تو اس پر قضاء لازم نہیں ہو گی۔“ اس روایت کے تمام راوی ثقہ ہیں۔ [سنن الدارقطني/ كِتَابُ الصِّيَامِ/حدیث: 2273]

یہی روایت ایک اور سند کے ہمراہ منقول ہے۔ [سنن الدارقطني/ كِتَابُ الصِّيَامِ/حدیث: 2274]

سیدنا ابوہریرہ رضی اللہ عنہ، نبی کریم صلی اللہ علیہ وسلم کا یہ فرمان نقل کرتے ہیں: ”جب روزہ دار کو منہ بھر کر قے آ جائے، تو اس پر روزہ توڑنا لازم نہیں ہو گا اور پھر اس پر قضاء بھی لازم نہیں ہو گی، اگر وہ جان بوجھ کر قے کر دے، تو اس پر قضاء لازم ہو گی۔“ اس روایت کا راوی یحییٰ بن سعید مستند نہیں ہے۔ [سنن الدارقطني/ كِتَابُ الصِّيَامِ/حدیث: 2275]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”جس شخص کو منہ بھر کر قے آئے، وہ اپنا روزہ پورا کرے، اس پر قضاء لازم نہیں ہو گی اور جو شخص جان بوجھ کر قے کر دے، وہ قضاء کرے۔“ [سنن الدارقطني/ كِتَابُ الصِّيَامِ/حدیث: 2276]