سعید رحمہ اللہ روایت کرتے ہیں کہ میں نے سفیان رحمہ اللہ کو یہ آیت تلاوت کرتے سنا: ﴿رَبِّ قَدْ آتَيْتَنِي مِنَ الْمُلْكِ وَعَلَّمْتَنِي مِنْ تَأْوِيلِ الْأَحَادِيثِ فَاطِرَ السَّمَاوَاتِ وَالْأَرْضِ أَنْتَ وَلِيِّي فِي الدُّنْيَا وَالْآخِرَةِ تَوَفَّنِي مُسْلِمًا﴾ یعنی اے میرے رب، تو نے مجھے حکومت عطا کی ہے اور مجھے خوابوں کی تعبیر کا علم دیا ہے، اے آسمانوں اور زمین کے پیدا کرنے والے! تو دنیا و آخرت میں میرا ولی ہے، مجھے مسلمان حالت میں وفات دے۔ سفیان رحمہ اللہ کہتے ہیں کہ: سیدنا یوسف علیہ السلام نے یہ درخواست اس وقت کی جب ان کے والدین ان کے پاس جمع ہو گئے اور وہ خوش ہو گئے، تو انہوں نے اپنے رب سے دعا کی کہ انہیں وفات دے کر صالحین کے ساتھ شامل کر دے۔ [سنن سعید بن منصور/كِتَابُ التَّفْسِيرِ/حدیث: 1145]