سیدنا ابوواقد لیثی رضی اللہ عنہ بیان کرتے ہیں: ایک مرتبہ نبی اکرم صلی اللہ علیہ وسلم مسجد میں تشریف فرما تھے کچھ لوگ آپ کے ساتھ موجود تھے۔ تین آدمی آئے اور ان میں سے دو آدمی آپ کی طرف آ گئے اور ایک شخص چلا گیا، جب وہ دونوں نبی اکرم صلی اللہ علیہ وسلم کے پاس پہنچے، تو ان دونوں نے سلام کیا۔ ان دونوں میں سے ایک نے حلقے میں گنجائش دیکھی تو وہاں بیٹھ گیا، جبکہ دوسرا شخص لوگوں کے پیچھے بیٹھ گیا۔ جہاں تک تیسرے شخص کا تعلق تھا، تو وہ منہ پھیر کر چلا گیا۔
جب نبی اکرم صلی اللہ علیہ وسلم (اپنی گفتگو) سے فارغ ہوئے، تو آپ نے ارشاد فرمایا:
”کیا میں تمہیں ان تین لوگوں کے بارے میں بتاؤں؟ ان میں سے ایک شخصاللہ تعالیٰ کی پناہ میں آیا، تواللہ تعالیٰ نے اسے پناہ عطا کی۔ دوسرے شخص نے حیا کی، تواللہ تعالیٰ نے بھی اس سے حیا کی اور تیسرے شخص نے منہ پھیر لیا، تواللہ تعالیٰ نے بھی اس سے منہ پھیر لیا۔“
[صحیح ابن حبان/كِتَابُ العِلْمِ/حدیث: 86]