جابر بن یزید عامری اپنے والد رضی اللہ عنہ کا یہ بیان نقل کرتے ہیں کہ میں نبی اکرم صلی اللہ علیہ وسلم کے ہمراہ آپ کے حج (یعنی حجۃ الوداع) میں شریک ہوا، میں نے آپ کی اقتدا میں صبح کی نماز منی میں موجود مسجدِ خیف میں ادا کی، جب نبی اکرم صلی اللہ علیہ وسلم نے نماز مکمل کر لی تو لوگوں کے پیچھے دو آدمی موجود تھے جنہوں نے (باجماعت) نماز ادا نہیں کی تھی، ان دونوں کو نبی اکرم صلی اللہ علیہ وسلم کی خدمت میں لایا گیا تو وہ دونوں کانپ رہے تھے، نبی اکرم صلی اللہ علیہ وسلم نے دریافت کیا: ”کیا وجہ ہے کہ تم دونوں نے ہمارے ساتھ نماز ادا نہیں کی؟“ ان دونوں نے عرض کی: یا رسول اللہ! ہم اپنی رہائشی جگہ پر نماز ادا کر چکے تھے، نبی اکرم صلی اللہ علیہ وسلم نے فرمایا: ”تم ایسا نہ کرو، جب تم اپنی رہائشی جگہ پر نماز ادا کر چکے ہو اور پھر تم جماعت کے ساتھ والی مسجد میں آؤ تو ان لوگوں کے ساتھ بھی نماز ادا کر لو، یہ تمہارے لیے نفل ہو جائے گی۔“ شیخ فرماتے ہیں کہ نبی اکرم صلی اللہ علیہ وسلم کا یہ فرمان ”تم ایسا نہ کرو“ یہ لفظ ممانعت کے ہیں لیکن اس سے مراد ابتدائی طور پر کوئی حکم دینا ہے۔ [صحیح ابن حبان/كِتَابُ الصَّلَاةِ/حدیث: 1565]