سیدنا رفاعہ بن رافع زرقی رضی اللہ عنہ بیان کرتے ہیں: ایک دن ہم نبی اکرم صلی اللہ علیہ وسلم کے پیچھے نماز ادا کر رہے تھے جب آپ نے رکوع سے سر اٹھایا، تو آپ نے «سَمِعَ اللهُ لِمَنْ حَمِدَہ» کہا: آپ کے پیچھے ایک شخص نے یہ کلمات پڑھے۔ ”اے ہمارے پروردگار! حمد تیرے ہی لئے مخصوص ہے۔ ایسی حمد جو زیادہ ہو پاکیزہ ہو اس میں برکت موجود ہو۔“ جب نبی اکرم صلی اللہ علیہ وسلم نے نماز مکمل کی تو آپ نے دریافت کیا۔ ابھی کلام کرنے والا شخص کون تھا۔ ایک صاحب نے عرض کی: یا رسول الله ( صلی اللہ علیہ وسلم ) میں تھا نبی اکرم صلی اللہ علیہ وسلم نے ارشاد فرمایا: میں نے تیس سے زیادہ فرشتوں کو دیکھا، وہ ان کلمات کی طرف لپکے، ان میں سے کون پہلے ان کلمات کو نوٹ کرتا ہے۔ [صحیح ابن حبان/كِتَابُ الصَّلَاةِ/حدیث: 1910]