سیدنا عبداللہ بن مسعود رضی اللہ عنہ بیان کرتے ہیں کہ نبی اکرم صلی اللہ علیہ وسلم سلام پھیرنے کے بعد صرف اتنی دیر بیٹھتے تھے جتنی دیر میں آپ صلی اللہ علیہ وسلم یہ پڑھتے تھے: «اَللّٰهُمَّ أَنْتَ السَّلَامُ وَمِنْكَ السَّلَامُ، تَبَارَكْتَ يَا ذَا الْجَلَالِ وَالْإِكْرَامِ» ”اے اللہ! تو سلامتی عطا کرنے والا ہے، سلامتی تجھ سے ہی حاصل ہو سکتی ہے، اے جلال اور اکرام والے! تو برکت والا ہے۔“ (امام ابن حبان رحمہ اللہ فرماتے ہیں:) عاصم احول نے یہ روایت عبداللہ بن حارث کے حوالے سے سیدہ عائشہ رضی اللہ عنہا سے سنی ہے اور انہوں نے یہ روایت عوسجہ بن رماح کے حوالے سے ابن ابوہذیل کے حوالے سے سیدنا عبداللہ بن مسعود رضی اللہ عنہ سے سنی ہے، تو اس کے دونوں طرق محفوظ ہیں۔ [صحیح ابن حبان/كِتَابُ الصَّلَاةِ/حدیث: 2002]