سیدنا انس بن مالک رضی اللہ عنہ بیان کرتے ہیں کہ ان کی نانی سیدہ ملیکہ رضی اللہ عنہا نے نبی اکرم صلی اللہ علیہ وسلم کی اس کھانے پر دعوت کی جو انہوں نے آپ صلی اللہ علیہ وسلم کے لیے تیار کیا تھا، نبی اکرم صلی اللہ علیہ وسلم نے اسے تناول فرمایا، پھر آپ صلی اللہ علیہ وسلم نے ارشاد فرمایا: ”تم لوگ اٹھو تاکہ میں تمہیں نماز پڑھاؤں۔“ سیدنا انس رضی اللہ عنہ کہتے ہیں کہ میں اٹھ کر اس چٹائی کی طرف گیا جو زیادہ استعمال کی وجہ سے سیاہ ہو چکی تھی، میں نے اسے پانی سے دھویا، نبی اکرم صلی اللہ علیہ وسلم اس پر کھڑے ہوئے، میں نے اور ایک دوسرے لڑکے نے آپ صلی اللہ علیہ وسلم کے پیچھے صف بنائی اور وہ بوڑھی خاتون ہمارے پیچھے کھڑی ہوئیں، نبی اکرم صلی اللہ علیہ وسلم نے ہمیں دو رکعات نماز پڑھانے کے بعد نماز ختم کر دی۔ [صحیح ابن حبان/كِتَابُ الصَّلَاةِ/حدیث: 2205]