ام المؤمنین سیدہ عائشہ رضی اللہ عنہا سے مروی ہے کہ رسول اللہ صلی اللہ علیہ وسلم ایک برتن «فَرَقٍ» سے غسلِ جنابت کر لیا کرتے تھے۔ امام ابوداؤد رحمہ اللہ نے کہا کہ معمر نے بواسطہ زہری اس حدیث میں روایت کیا ہے کہ سیدہ عائشہ رضی اللہ عنہا نے کہا: ”میں اور رسول اللہ صلی اللہ علیہ وسلم ایک برتن سے غسل کر لیا کرتے تھے جس میں ایک «فَرَقٍ» کے برابر پانی آتا تھا۔“ امام ابوداؤد رحمہ اللہ نے کہا کہ ابن عیینہ نے بھی حدیثِ مالک کی مانند روایت کیا ہے۔ امام ابوداؤد رحمہ اللہ کہتے ہیں: میں نے امام احمد بن حنبل رحمہ اللہ سے سنا، وہ کہہ رہے تھے کہ ” «فَرَقٍ» (ایک برتن ہے) اس میں باعتبارِ مقدار سولہ رطل آتے ہیں“ اور میں نے ان کو سنا، کہہ رہے تھے کہ ”ابن ابی ذئب کا «صَاعٌ» (باعتبارِ وزن) پانچ رطل اور تہائی رطل کے برابر ہوتا ہے۔“ کہا گیا کہ ”جو لوگ «صَاعٌ» کو آٹھ رطل کے برابر بتاتے ہیں؟“ انہوں نے فرمایا کہ ”ان کا قول (صحیح اور) محفوظ نہیں ہے۔“ کہتے ہیں کہ میں نے امام احمد رحمہ اللہ کو سنا، وہ کہہ رہے تھے کہ ”جو شخص ہمارے اس رطل کے مطابق پانچ رطل اور ایک تہائی رطل (شرعی ایک صاع) صدقہ فطر ادا کر دے، تو اس نے پورا فطرانہ ادا کر دیا۔“ کہا گیا: ”(مدینے کی) صیحانی کھجور بھاری ہوتی ہے۔“ کہا: ”صیحانی بہترین کھجور ہے؟“ کہا: ”میں نہیں جانتا۔“ [سنن ابي داود/كِتَاب الطَّهَارَةِ/حدیث: 238]