سیدہ امیمہ بنت رقیقہ رضی اللہ عنہا بیان کرتی ہیں: میں نبی اکرم صلی اللہ علیہ وسلم کی خدمت میں کچھ خواتین کے ہمراہ حاضر ہوئی جنہوں نے نبی اکرم صلی اللہ علیہ وسلم کے دست اقدس پر بیعت کرنی تھی، ان خواتین نے عرض کی: یا رسول اللہ صلی اللہ علیہ وسلم ! ہم آپ کے دست اقدس پر اس بات کی بیعت کرتی ہیں کہ ﴿ہم کسی کو اللہ کا شریک نہیں ٹھہرائیں گی، ہم چوری نہیں کریں گی، ہم زنا نہیں کریں گی، ہم اپنی اولاد کو قتل نہیں کریں گی، ہم اپنی طرف سے بنا کر کسی پر جھوٹا الزام نہیں لگائیں گی اور ہم نیکی کے کام میں آپ صلی اللہ علیہ وسلم کی نافرمانی نہیں کریں گی﴾ [سورة الممتحنة: 12] ۔ نبی اکرم صلی اللہ علیہ وسلم نے فرمایا: «فِيمَا اسْتَطَعْتُنَّ وَأَطَقْتُنَّ» ”تم اپنی استطاعت کے مطابق اور طاقت کے مطابق (اس پر عمل کرنا)۔“ وہ خاتون بیان کرتی ہیں: میں نے عرض کی: اللہ اور اس کے رسول ہماری اپنی جان سے زیادہ ہمارے بارے میں رحم دل ہیں، یا رسول اللہ صلی اللہ علیہ وسلم ! آپ آگے ہاتھ بڑھائیے تاکہ ہم آپ صلی اللہ علیہ وسلم کی بیعت کریں۔ نبی اکرم صلی اللہ علیہ وسلم نے ارشاد فرمایا: «إِنِّي لَا أُصَافِحُ النِّسَاءَ، إِنَّمَا قَوْلِي لِمِائَةِ امْرَأَةٍ كَقَوْلِي لِامْرَأَةٍ وَاحِدَةٍ» ”میں خواتین کے ساتھ مصافحہ نہیں کرتا، میں ایک سو خواتین کے ساتھ جس طرح بات کرتا ہوں، اسی طرح ایک خاتون کے ساتھ بات کرتا ہوں“ (یہاں ایک لفظ کے بارے میں راوی کو شک ہے)۔ [صحیح ابن حبان/كِتَابُ السِّيَرِ/حدیث: 4553]