سیدنا عبداللہ بن عمرو رضی اللہ عنہما بیان کرتے ہیں کہ جب نبی اکرم صلی اللہ علیہ وسلم کو مالِ غنیمت حاصل ہوتا تو آپ صلی اللہ علیہ وسلم سیدنا بلال رضی اللہ عنہ کو حکم دیتے کہ وہ لوگوں میں اعلان کر دیں، تو لوگ اپنے اپنے مالِ غنیمت کو لے آتے، (ایک مرتبہ) نبی اکرم صلی اللہ علیہ وسلم نے اس میں سے ”خمس“ نکال کر بقیہ مال تقسیم کر دیا تو اس کے بعد ایک شخص بالوں سے بنی ہوئی رسی لے کر آیا، نبی اکرم صلی اللہ علیہ وسلم نے دریافت فرمایا: ”کیا تم نے بلال کا تین مرتبہ کیا ہوا اعلان نہیں سنا تھا؟“ اس نے جواب دیا: جی ہاں (سنا تھا)۔ نبی اکرم صلی اللہ علیہ وسلم نے دریافت فرمایا: ”پھر کیا وجہ ہے تم اسے پہلے کیوں لے کر نہیں آئے؟“ اس شخص نے آپ صلی اللہ علیہ وسلم کی خدمت میں معذرت پیش کی، تو نبی اکرم صلی اللہ علیہ وسلم نے فرمایا: ”تم ایسے ہو جاؤ کہ اگر تم اسے قیامت کے دن بھی لے کر آؤ گے تو میں اسے تم سے قبول نہیں کروں گا۔“ [صحیح ابن حبان/كِتَابُ السِّيَرِ/حدیث: 4809]