سیدنا جابر رضی اللہ عنہ بیان کرتے ہیں کہ سیدنا عمرو بن جموح رضی اللہ عنہ نبی اکرم صلی اللہ علیہ وسلم کی خدمت میں غزوہ احد کے دن حاضر ہوئے، انہوں نے عرض کی: یا رسول اللہ صلی اللہ علیہ وسلم ! آج جو شخص شہید ہو جائے کیا وہ جنت میں داخل ہو گا؟ نبی اکرم صلی اللہ علیہ وسلم نے فرمایا: ”جی ہاں۔“ انہوں نے عرض کی: اس ذات کی قسم جس کے دستِ قدرت میں میری جان ہے! میں اپنے گھر والوں کی طرف واپس نہیں جاؤں گا بلکہ جنت میں داخل ہوں گا، تو سیدنا عمر بن خطاب رضی اللہ عنہ نے ان سے کہا: اے عمرو! تم اس پر اللہ کے نام کی قسم نہ اٹھاؤ، تو نبی اکرم صلی اللہ علیہ وسلم نے فرمایا: ”اے عمر! رہنے دو کیونکہ کچھ لوگ ایسے ہوتے ہیں کہ اگر وہ اللہ کے نام کی قسم اٹھا لیں تو اللہ تعالیٰ وہ کام پورا کروا دیتا ہے اور ان میں سے ایک عمرو بن جموح ہے۔“ (بعد میں نبی اکرم صلی اللہ علیہ وسلم نے ان کے بارے میں فرمایا): ”وہ جنت کے تالاب میں غوطے لگا رہا ہے۔“ [صحیح ابن حبان/كِتَابُ إِخْبَارِهِ ﷺ عَنْ مَنَاقِبِ الصَّحَابَةِ رِجَالِهِمْ وَنِسَائِهِمْ بِذِكْرِ أَسْمَائِهِمْ رِضْوَانُ اللَّهِ عَلَيْهِمْ أَجْمَعِينَ/حدیث: 7024]