سیدنا خالد بن ولید رضی اللہ عنہ بیان کرتے ہیں کہ میرے اور سیدنا عمار بن یاسر رضی اللہ عنہما کے درمیان تلخ کلامی ہو گئی، تو سیدنا عمار رضی اللہ عنہ گئے اور انہوں نے نبی اکرم صلی اللہ علیہ وسلم سے اس کی شکایت کی، سیدنا خالد رضی اللہ عنہ نے سختی کا اظہار کیا۔ نبی اکرم صلی اللہ علیہ وسلم خاموش رہے، پھر سیدنا عمار رضی اللہ عنہ رونے لگے اور انہوں نے عرض کی: ”یا رسول اللہ صلی اللہ علیہ وسلم ! کیا آپ اسے سن نہیں رہے؟“ سیدنا خالد رضی اللہ عنہ بیان کرتے ہیں کہ نبی اکرم صلی اللہ علیہ وسلم نے اپنا سر مبارک اٹھا کر میری طرف دیکھا اور فرمایا: «مَنْ عَادَى عَمَّارًا عَادَاهُ اللَّهُ، وَمَنْ أَبْغَضَ عَمَّارًا أَبْغَضَهُ اللَّهُ» ”جو شخص عمار سے دشمنی رکھے اللہ تعالیٰ اس سے دشمنی رکھے اور جو شخص اس سے بغض رکھے اللہ تعالیٰ اس سے بغض رکھے۔“ سیدنا خالد رضی اللہ عنہ کہتے ہیں کہ جب میں وہاں سے نکلا تو سیدنا عمار رضی اللہ عنہ کی رضامندی سے زیادہ اور کوئی چیز میرے نزدیک محبوب نہیں تھی، پھر میں ان سے ملا (ان سے معذرت کی) تو وہ راضی ہو گئے۔ [صحیح ابن حبان/كِتَابُ إِخْبَارِهِ ﷺ عَنْ مَنَاقِبِ الصَّحَابَةِ رِجَالِهِمْ وَنِسَائِهِمْ بِذِكْرِ أَسْمَائِهِمْ رِضْوَانُ اللَّهِ عَلَيْهِمْ أَجْمَعِينَ/حدیث: 7081]