سیدنا عبداللہ بن ابواوفیٰ رضی اللہ عنہما بیان کرتے ہیں کہ سیدنا عبدالرحمن بن عوف رضی اللہ عنہ نے نبی اکرم صلی اللہ علیہ وسلم کی خدمت میں سیدنا خالد بن ولید رضی اللہ عنہ کی شکایت کی، تو نبی اکرم صلی اللہ علیہ وسلم نے فرمایا: ”اے خالد! تم نے اہل بدر سے تعلق رکھنے والے ایک شخص کو کیوں تکلیف پہنچائی ہے؟ اگر تم احد پہاڑ جتنا سونا (اللہ کی راہ میں) خرچ کرو، تو تم پھر بھی اس کے عمل تک نہیں پہنچ سکتے۔“ انہوں نے عرض کی: یا رسول اللہ صلی اللہ علیہ وسلم ! یہ میرے خلاف باتیں کر رہے تھے، تو میں نے انہیں جواب دیا ہے، تو نبی اکرم صلی اللہ علیہ وسلم نے فرمایا: ”تم لوگ خالد کو تکلیف نہ پہنچاؤ کیونکہ وہ اللہ کی تلوار ہے جسے اللہ تعالیٰ نے کفار پر سونت رکھی ہے۔“ [صحیح ابن حبان/كِتَابُ إِخْبَارِهِ ﷺ عَنْ مَنَاقِبِ الصَّحَابَةِ رِجَالِهِمْ وَنِسَائِهِمْ بِذِكْرِ أَسْمَائِهِمْ رِضْوَانُ اللَّهِ عَلَيْهِمْ أَجْمَعِينَ/حدیث: 7091]