سیدنا انس رضی اللہ عنہ بیان کرتے ہیں کہ سیدنا ابوطلحہ رضی اللہ عنہ نے سورہ توبہ کی تلاوت کی، جب وہ اس آیت ﴿انْفِرُوا خِفَافًا وَثِقَالًا﴾ [سورة التوبة: 41] ”تم لوگ (جہاد کے لیے) نکل کھڑے ہو خواہ ہلکے ہو یا بوجھل ہو“ پر پہنچے، تو سیدنا ابوطلحہ رضی اللہ عنہ نے کہا: کیا میں نہیں دیکھ رہا کہ میرے پروردگار نے مجھے نکلنے کے لیے کہا ہے، خواہ میں جوان ہوں یا بوڑھا ہوں، تم لوگ میرا سامان تیار کرو۔ ان کے بیٹوں نے ان سے کہا: آپ نے نبی اکرم صلی اللہ علیہ وسلم کے ہمراہ غزوات میں شرکت کی ہے یہاں تک کہ نبی اکرم صلی اللہ علیہ وسلم کا وصال ہو گیا، پھر آپ نے سیدنا ابوبکر رضی اللہ عنہ کے ہمراہ جنگوں میں حصہ لیا، یہاں تک کہ ان کا بھی انتقال ہو گیا، پھر آپ نے سیدنا عمر رضی اللہ عنہ کے ہمراہ جنگ میں حصہ لیا، اب ہم لوگ آپ کی جگہ جنگ میں شرکت کے لیے چلے جاتے ہیں، تو سیدنا ابوطلحہ رضی اللہ عنہ نے کہا: تم لوگ میرا سامان تیار کرو۔ ان لوگوں نے ان کا سامان تیار کیا، وہ سمندری سفر پر روانہ ہوئے، اسی دوران ان کا انتقال ہو گیا۔ ان کے ساتھیوں کو انہیں دفن کرنے کے لیے کوئی جزیرہ نہیں ملا، ان کے انتقال کے سات دن بعد انہیں جزیرہ ملا (جہاں وہ انہیں دفن کرتے) لیکن اس دوران ان کی (میت میں) کوئی تبدیلی نہیں آئی (یعنی میت خراب نہیں ہوئی)۔ [صحیح ابن حبان/كِتَابُ إِخْبَارِهِ ﷺ عَنْ مَنَاقِبِ الصَّحَابَةِ رِجَالِهِمْ وَنِسَائِهِمْ بِذِكْرِ أَسْمَائِهِمْ رِضْوَانُ اللَّهِ عَلَيْهِمْ أَجْمَعِينَ/حدیث: 7184]