سیدنا ابوموسیٰ اشعری رضی اللہ عنہ بیان کرتے ہیں کہ غزوہ حنین کے موقع پر نبی اکرم صلی اللہ علیہ وسلم نے سیدنا ابوعامر اشعری رضی اللہ عنہ کو دشمن کا پیچھا کرنے والے گھڑ سواروں کا امیر مقرر کیا، جب ہوازن قبیلے سے تعلق رکھنے والے لوگ پسپا ہوئے تو سیدنا ابوعامر اشعری رضی اللہ عنہ نے ان کا پیچھا کیا، یہاں تک کہ وہ درید بن صمہ تک پہنچ گئے، انہوں نے اپنے گھوڑے کو تیز دوڑایا اور پھر ابن درید نے ابوعامر کو شہید کر دیا۔ سیدنا ابوموسیٰ اشعری رضی اللہ عنہ کہتے ہیں کہ میں نے ابن درید پر حملہ کر کے اسے مار دیا اور جھنڈا میں نے لے لیا، پھر میں لوگوں کے ساتھ نبی اکرم صلی اللہ علیہ وسلم کی خدمت میں حاضر ہوا، جب آپ نے مجھے دیکھا اور میرے ہاتھ میں جھنڈے کو دیکھا تو دریافت فرمایا: ”اے ابوموسیٰ! کیا ابوعامر شہید ہو گیا ہے؟“ میں نے عرض کی: جی ہاں، یا رسول اللہ! تو نبی اکرم صلی اللہ علیہ وسلم نے اپنے دونوں ہاتھ بلند کر کے ان کے لیے دعا کی، آپ نے یہ دعا فرمائی: «اللَّهُمَّ اجْعَلْ عَبْدَكَ أَبَا عَامِرٍ يَوْمَ الْقِيَامَةِ فَوْقَ كَثِيرٍ مِنْ خَلْقِكَ مِنَ النَّاسِ» ”اے اللہ! ابوعامر کو ان لوگوں میں شامل کر دے جو قیامت کے دن زیادہ (اجر و ثواب والے) ہوں گے۔“ [صحیح ابن حبان/كِتَابُ إِخْبَارِهِ ﷺ عَنْ مَنَاقِبِ الصَّحَابَةِ رِجَالِهِمْ وَنِسَائِهِمْ بِذِكْرِ أَسْمَائِهِمْ رِضْوَانُ اللَّهِ عَلَيْهِمْ أَجْمَعِينَ/حدیث: 7191]