سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم نے حنین کا مالِ غنیمت تقسیم کیا، آپ نے اقرع بن حابس کو ایک سو اونٹ دیے، عیینہ بن بدر کو ایک سو اونٹ دیے، پھر سیدنا انس رضی اللہ عنہ نے انصار کے ایک گروہ کا ذکر کرتے ہوئے یہ کہا کہ ان لوگوں نے عرض کی: یا رسول اللہ! آپ نے ہمارا مالِ غنیمت ان لوگوں کو دے دیا جن کے خون ہماری تلواروں سے ٹپک رہے ہیں (راوی کو شک ہے کہ شاید یہ الفاظ ہیں:) ان کا خون ہماری تلواروں سے ٹپک رہا ہے۔ اس بات کی اطلاع نبی اکرم صلی اللہ علیہ وسلم کو ملی، تو آپ نے انصار کو اکٹھا کیا، آپ نے فرمایا: ”کیا تمہارے درمیان تمہارے علاوہ کوئی اور ہے؟“ لوگوں نے عرض کی: جی نہیں، صرف ہمارا ایک بھانجا ہے۔ نبی اکرم صلی اللہ علیہ وسلم نے فرمایا: ”قوم کا بھانجا ان کا حصہ ہوتا ہے۔“ پھر آپ نے ارشاد فرمایا: ”اے انصار کے گروہ! کیا تم اس بات میں دلچسپی نہیں رکھتے کہ لوگ دنیاوی چیزیں، بکریاں اور اونٹ لے جائیں اور تم محمد صلی اللہ علیہ وسلم کو اپنے علاقے میں لے جاؤ؟“ لوگوں نے عرض کی: جی ہاں یا رسول اللہ! نبی اکرم صلی اللہ علیہ وسلم نے ارشاد فرمایا: ”اس ذات کی قسم جس کے دستِ قدرت میں محمد کی جان ہے، اگر لوگ ایک وادی میں چلیں اور انصار دوسری گھاٹی میں جائیں، تو میں انصار کی گھاٹی کو اختیار کروں گا۔ انصار میرے انتہائی قریبی ہیں، اگر ہجرت نہ ہوتی تو میں انصار کا ایک فرد ہوتا۔“ [صحیح ابن حبان/كِتَابُ إِخْبَارِهِ ﷺ عَنْ مَنَاقِبِ الصَّحَابَةِ رِجَالِهِمْ وَنِسَائِهِمْ بِذِكْرِ أَسْمَائِهِمْ رِضْوَانُ اللَّهِ عَلَيْهِمْ أَجْمَعِينَ/حدیث: 7268]