سیدنا مقداد رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جب قیامت کا دن ہو گا، تو سورج لوگوں کے قریب ہو جائے گا، یہاں تک کہ وہ ایک میل یا دو میل جتنا دور ہو گا۔“ سلیم نامی راوی کہتے ہیں: مجھے نہیں معلوم اس سے مراد کون سا میل ہے؟ کیا میل کی مسافت مراد ہے؟ یا وہ سلائی مراد ہے جس کے ذریعے آنکھ میں سرمہ لگایا جاتا ہے۔ نبی اکرم صلی اللہ علیہ وسلم نے فرمایا: ”سورج ان کے قریب ترین ہو گا اور وہ لوگ پسینے میں ڈوبے ہوئے ہوں گے جو اپنے اعمال کے حساب سے ہوں گے، ان میں سے کچھ کا پسینہ ان کے ٹخنوں تک آ رہا ہو گا، کچھ کا گھٹنوں تک آ رہا ہو گا، کچھ کا پیٹ کے نچلے حصے تک آ رہا ہو گا، کچھ کا منہ تک آ رہا ہو گا۔“ راوی بیان کرتے ہیں: میں نے نبی اکرم صلی اللہ علیہ وسلم کو دیکھا کہ آپ نے اپنے دست مبارک کے ذریعے اپنے منہ کی طرف اشارہ کر کے یہ فرمایا: ”اس کی لگام اس کے منہ میں ڈالی جائے گی۔“ [صحیح ابن حبان/كِتَابُ إِخْبَارِهِ ﷺ عَنْ مَنَاقِبِ الصَّحَابَةِ رِجَالِهِمْ وَنِسَائِهِمْ بِذِكْرِ أَسْمَائِهِمْ رِضْوَانُ اللَّهِ عَلَيْهِمْ أَجْمَعِينَ/حدیث: 7330]