سیدنا عبداللہ بن عمر رضی اللہ عنہما سے روایت ہے کہ ”رسول اللہ صلی اللہ علیہ وسلم نے مغرب اور عشاء کی نمازیں مزدلفہ میں اکٹھی کر کے پڑھیں۔“ [سنن ابي داود/كِتَاب الْمَنَاسِكِ/حدیث: 1926]

امام زہری رحمہ اللہ نے اپنی سند سے مذکورہ بالا حدیث کے ہم معنی روایت کی اور کہا: ”ایک ایک اقامت سے ان دونوں نمازوں کو جمع کیا۔“ امام احمد رحمہ اللہ نے کہا: ”وکیع نے بیان کیا کہ آپ صلی اللہ علیہ وسلم نے ہر نماز (الگ) اقامت سے پڑھی۔“ [سنن ابي داود/كِتَاب الْمَنَاسِكِ/حدیث: 1927]

عثمان بن عمر رضی اللہ عنہ نے ابن ابی ذئب سے، انہوں نے زہری سے، یعنی امام احمد بن حنبل عن حماد کی سند سے، اور اس کے ہم معنی بیان کیا کہ ”ہر نماز کے لیے ایک اقامت کہی اور پہلی میں اذان نہیں دی اور نہ کسی کے بعد سنتیں پڑھیں۔“ مخلد نے کہا: ”ان میں سے ایک کے لیے اذان نہیں دی۔“ [سنن ابي داود/كِتَاب الْمَنَاسِكِ/حدیث: 1928]

عبداللہ بن مالک (بن حارث) بیان کرتے ہیں کہ میں نے سیدنا عبداللہ بن عمر رضی اللہ عنہ کے ساتھ نماز پڑھی۔ مغرب کی تین اور عشاء کی دو رکعتیں۔ مالک بن حارث نے ان سے کہا: ”یہ کس طرح کی نماز ہے؟“ انہوں نے کہا: ”میں نے ان کو رسول اللہ صلی اللہ علیہ وسلم کے ساتھ اس جگہ ایک ہی تکبیر کے ساتھ پڑھا ہے۔“ [سنن ابي داود/كِتَاب الْمَنَاسِكِ/حدیث: 1929]

سعید بن جبیر اور عبداللہ بن مالک دونوں سے روایت ہے کہ: ”ہم نے ابن عمر رضی اللہ عنہما کے ساتھ مزدلفہ میں مغرب اور عشاء کی نمازیں ایک تکبیر کے ساتھ پڑھیں۔“ اور محمد بن کثیر کی روایت کے ہم معنی بیان کیا۔ [سنن ابي داود/كِتَاب الْمَنَاسِكِ/حدیث: 1930]

سعید بن جبیر رحمہ اللہ نے کہا: ”ہم سیدنا ابن عمر رضی اللہ عنہ کی معیت میں (عرفات سے) لوٹے۔ جب مزدلفہ پہنچے تو انہوں نے ہمیں مغرب اور عشاء کی نمازیں تین رکعتیں اور دو رکعتیں ایک تکبیر کے ساتھ پڑھائیں۔ جب فارغ ہوئے تو ابن عمر رضی اللہ عنہ نے کہا: ”رسول اللہ صلی اللہ علیہ وسلم نے اس جگہ ہمیں اسی طرح نماز پڑھائی تھی۔“” [سنن ابي داود/كِتَاب الْمَنَاسِكِ/حدیث: 1931]

سلمہ بن کہیل نے کہا کہ میں نے جناب سعید بن جبیر رضی اللہ عنہ کو مزدلفہ میں دیکھا کہ انہوں نے اقامت کہی اور مغرب کی تین رکعتیں پڑھیں، پھر عشاء کی دو رکعتیں پڑھیں، پھر انہوں نے کہا: ”میں سیدنا ابن عمر رضی اللہ عنہ کے ساتھ حاضر تھا، انہوں نے اس جگہ اسی طرح کیا تھا اور انہوں نے بیان کیا تھا کہ میں رسول اللہ صلی اللہ علیہ وسلم کے ساتھ تھا اور آپ صلی اللہ علیہ وسلم نے اس جگہ اسی طرح کیا تھا۔“ [سنن ابي داود/كِتَاب الْمَنَاسِكِ/حدیث: 1932]

اشعث بن سلیم اپنے والد سے بیان کرتے ہیں کہ ”میں سیدنا ابن عمر رضی اللہ عنہ کے ساتھ عرفات سے مزدلفہ آیا۔ انہوں نے اس دوران میں تکبیر اور تہلیل کو نہیں چھوڑا حتیٰ کہ ہم مزدلفہ پہنچ گئے۔ پھر اذان اور اقامت کہی یا کسی کو حکم دیا کہ اذان اور اقامت کہے۔ پھر ہمیں مغرب کی تین رکعتیں پڑھائیں، پھر ہماری طرف متوجہ ہوئے اور کہا: ”نماز (عشاء کی بھی)“ پس ہمیں عشاء کی نماز پڑھائی، دو رکعتیں۔ پھر اپنا رات کا کھانا طلب کیا۔“ (اشعث بن سلیم نے) کہا: ”مجھے علاج بن عمرو نے اسی طرح بیان کیا جیسے کہ میرے والد (سلیم بن اسود) نے سیدنا ابن عمر رضی اللہ عنہ سے روایت کیا۔“ سیدنا ابن عمر رضی اللہ عنہ سے اس بارے میں پوچھا گیا تو انہوں نے کہا: ”میں نے رسول اللہ صلی اللہ علیہ وسلم کے ساتھ ایسے ہی پڑھی تھی۔“ [سنن ابي داود/كِتَاب الْمَنَاسِكِ/حدیث: 1933]

سیدنا عبداللہ بن مسعود رضی اللہ عنہ نے بیان کیا کہ ”میں نے رسول اللہ صلی اللہ علیہ وسلم کو کبھی نہیں دیکھا کہ آپ صلی اللہ علیہ وسلم نے کوئی نماز بے وقت پڑھی ہو۔ آپ صلی اللہ علیہ وسلم ہمیشہ وقت پر نماز پڑھتے تھے، مگر مزدلفہ میں آپ صلی اللہ علیہ وسلم نے مغرب اور عشاء کو جمع کر کے پڑھا (تاخیر سے) اور اگلے دن کی فجر کی نماز اپنے وقت سے پہلے پڑھی۔“ [سنن ابي داود/كِتَاب الْمَنَاسِكِ/حدیث: 1934]

سیدنا علی رضی اللہ عنہ بیان کرتے ہیں کہ (مزدلفہ میں) جب نبی کریم صلی اللہ علیہ وسلم نے صبح کی اور جبل قزح پر وقوف کیا تو فرمایا: ”یہ قزح ہے اور جائے وقوف ہے اور مزدلفہ سارا ہی جائے وقوف ہے، میں نے اس جگہ قربانی کی ہے اور منیٰ سب ہی قربان گاہ ہے، سو اپنے اپنے پڑاؤ پر قربانیاں کرو۔“ [سنن ابي داود/كِتَاب الْمَنَاسِكِ/حدیث: 1935]