محمد بن عبید بن ابی صالح جو ایلیاء (بیت المقدس) میں رہتے تھے، کہتے ہیں کہ میں عدی بن عدی کندی کی معیت میں روانہ ہوا حتیٰ کہ ہم مکہ پہنچ گئے۔ پس انہوں نے مجھے صفیہ بنت شیبہ رحمہا اللہ کے ہاں بھیجا، انہوں نے سیدہ عائشہ رضی اللہ عنہا سے (بہت کچھ) یاد کیا ہوا تھا۔ انہوں نے کہا کہ میں نے سیدہ عائشہ رضی اللہ عنہا کو کہتے ہوئے سنا، وہ فرماتی تھیں کہ میں نے رسول اللہ صلی اللہ علیہ وسلم سے سنا، آپ صلی اللہ علیہ وسلم فرماتے تھے: ” «الْإِغْلَاقُ» میں طلاق نہیں اور نہ غلام کو آزاد کرنا ہے۔“ امام ابوداؤد رحمہ اللہ کہتے ہیں: «الْغَلَاقُ» (اور «الْإِغْلَاقُ») میرے خیال میں غضب اور غصے کے معنی میں ہے۔ [سنن ابي داود/كتاب تفريع أبواب الطلاق /حدیث: 2193]