سیدنا سمرہ بن جندب رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”جب تم میں سے کوئی (دوران سفر میں) جانوروں کے پاس سے گزرے اور ان میں ان کا مالک موجود ہو تو اس سے اجازت لے، اگر وہ اجازت دے دے، تو دودھ دوہ لے اور پی لے، اگر مالک موجود نہ ہو تو تین بار آواز لگائے، اگر وہ جواب دے تو اس سے اجازت طلب کرے ورنہ دودھ نکال لے اور پی لے مگر ساتھ نہ لے جائے۔“ [سنن ابي داود/كِتَاب الْجِهَادِ/حدیث: 2619]

سیدنا عباد بن شرحبیل رضی اللہ عنہ کا بیان ہے کہ مجھے قحط (اور بھوک) نے ستایا، تو میں مدینہ کے ایک باغ میں چلا گیا اور وہاں سے میں نے ایک بالی لی، اسے مسلا اور کھا لیا اور کچھ اپنے کپڑے میں بھی باندھ لیے چلا، پس باغ کا مالک آ گیا تو اس نے مجھے مارا اور میرا کپڑا بھی چھین لیا۔ میں رسول اللہ صلی اللہ علیہ وسلم کی خدمت میں آ گیا تو آپ صلی اللہ علیہ وسلم نے اس سے فرمایا: ”تو نے اسے سمجھایا نہیں جبکہ یہ نادان تھا اور نہ تو نے اس کو کھلایا جبکہ یہ بھوکا تھا۔“ (لفظ «جَائِعًا» بولا یا «سَاغِبًا» معنی ایک ہی ہے) پھر آپ صلی اللہ علیہ وسلم نے اس کو حکم دیا، تو اس نے میرا کپڑا واپس کر دیا اور مجھے ایک وسق یا آدھا وسق طعام بھی دیا۔ [سنن ابي داود/كِتَاب الْجِهَادِ/حدیث: 2620]

ابوبشر رحمہ اللہ روایت کرتے ہیں کہ ”میں نے عباد بن شرحبیل رضی اللہ عنہ سے سنا جو ہمارے قبیلہ بنی غبر میں سے تھے“ اور انہوں نے مذکورہ بالا حدیث کے ہم معنی روایت کی۔ [سنن ابي داود/كِتَاب الْجِهَادِ/حدیث: 2621]