جناب عبداللہ بن عمرو بن فغواء خزاعی اپنے والد سے بیان کرتے ہیں کہ رسول اللہ صلی اللہ علیہ وسلم نے مجھے بلوایا، جبکہ آپ صلی اللہ علیہ وسلم مجھے کچھ مال دے کر مکہ میں سیدنا ابوسفیان رضی اللہ عنہ کے پاس بھیجنا چاہ رہے تھے جو وہ اہل قریش میں تقسیم کر دیتا اور یہ فتح مکہ کے بعد کا واقعہ ہے۔ آپ صلی اللہ علیہ وسلم نے مجھے فرمایا: ”کوئی رفیق سفر ڈھونڈ لو۔“ چنانچہ عمرو بن امیہ ضمری میرے پاس آیا اور کہا: ”سنا ہے کہ تم مکے جانا چاہتے ہو اور رفیق سفر کی تلاش میں ہو۔“ میں نے کہا: ”ہاں۔“ اس نے کہا: ”میں تمہارے ساتھ چلوں گا۔“ چنانچہ میں رسول اللہ صلی اللہ علیہ وسلم کی خدمت میں حاضر ہوا اور عرض کیا: ”میں نے رفیق سفر ڈھونڈ لیا ہے۔“ آپ صلی اللہ علیہ وسلم نے پوچھا: ”کون؟“ میں نے بتایا: ”عمرو بن امیہ ضمری۔“ آپ صلی اللہ علیہ وسلم نے فرمایا: ”جب تم اس کی قوم کے علاقے میں اترو تو ہوشیار رہنا۔“ کہنے والے نے کہا ہے کہ «الْبِكْرِيُّ» ”بکری (با کے زیر کے ساتھ) تیرا بھائی ہے، مگر اس پر اعتماد نہ کرنا۔“ چنانچہ ہم نکل پڑے، حتیٰ کہ جب میں ابواء مقام پر پہنچا تو اس نے مجھ سے کہا: ”مجھے اپنی قوم سے ایک کام ہے، میں ودان جا رہا ہوں تم یہاں رک کر میرا انتظار کرنا۔“ میں نے کہا: ”خیر سلامتی سے جاؤ۔“ جب وہ روانہ ہوا تو مجھے نبی کریم صلی اللہ علیہ وسلم کا فرمان یاد آیا، تو میں اپنے اونٹ پر سوار ہو لیا اور اسے بھگاتا ہوا اصافر تک جا پہنچا۔ تو اچانک دیکھتا ہوں کہ امیہ اپنی قوم کے کچھ لوگوں کے ساتھ میرے آڑے آ گیا ہے۔ چنانچہ میں نے اپنا اونٹ اور تیز بھگایا حتیٰ کہ ان سے آگے نکل گیا۔ جب انہوں نے دیکھا کہ میں ان کے ہاتھوں سے نکل گیا ہوں تو وہ واپس ہو گئے۔ پھر وہ (اکیلا) میرے پاس آیا اور کہنے لگا: ”مجھے اپنی قوم کے ہاں ایک کام تھا۔“ میں نے کہا: ”ہو گا۔“ حتیٰ کہ ہم مکہ آ گئے اور میں نے وہ مال سیدنا ابوسفیان رضی اللہ عنہ کے حوالے کر دیا۔ [سنن ابي داود/كِتَاب الْأَدَبِ/حدیث: 4861]

سیدنا ابوہریرہ رضی اللہ عنہ سے مروی ہے کہ نبی کریم صلی اللہ علیہ وسلم نے فرمایا: ”مومن ایک بل سے دو بار نہیں ڈسا جاتا۔“ [سنن ابي داود/كِتَاب الْأَدَبِ/حدیث: 4862]