جناب غالب (غالب بن خطاف بصری) نے بیان کیا کہ ہم جناب حسن بصری رحمہ اللہ کے دروازے پر بیٹھے ہوئے تھے کہ ایک آدمی آیا اور اس نے کہا کہ مجھے میرے والد نے میرے دادا سے روایت کیا، انہوں نے کہا: ”میرے والد نے مجھ کو رسول اللہ صلی اللہ علیہ وسلم کی خدمت میں بھیجا اور کہا کہ آپ صلی اللہ علیہ وسلم کے پاس جاؤ اور آپ صلی اللہ علیہ وسلم کو میرا سلام کہنا۔“ چنانچہ میں آپ صلی اللہ علیہ وسلم کی خدمت میں حاضر ہوا اور عرض کیا کہ ”میرے والد نے آپ کو سلام کہا ہے۔“ تو آپ صلی اللہ علیہ وسلم نے فرمایا: ” «عَلَيْكَ وَعَلَىٰ أَبِيكَ السَّلَامُ» ”تم پر اور تمہارے والد پر سلامتی ہو۔“” [سنن ابي داود/أبواب السلام /حدیث: 5231]

ام المؤمنین سیدہ عائشہ رضی اللہ عنہا نے بیان کیا کہ نبی کریم صلی اللہ علیہ وسلم نے ان سے فرمایا: ”تحقیق جبرائیل علیہ السلام تجھے سلام کہہ رہے ہیں۔“ تو انہوں نے کہا: «وَعَلَيْهِ السَّلَامُ وَرَحْمَةُ اللّٰهِ» ”اور ان پر بھی سلامتی اور اللہ کی رحمت ہو۔“ [سنن ابي داود/أبواب السلام /حدیث: 5232]