حضرت عبدالرحمن بن صعصعہ رضی اللہ عنہ (جو حضرت ابو سعید خدری رضی اللہ عنہ کی کفالت میں تھے) سے روایت ہے، انہوں نے کہا: مجھ سے حضرت ابو سعید رضی اللہ عنہ نے فرمایا: ”جب تم جنگل میں ہو تو اذان بلند آواز میں سنا دیا کرو کیونکہ میں نے رسول اللہ صلی اللہ علیہ وسلم سے یہ ارشاد سنا ہے: ”جو بھی جن، انسان، درخت یا پتھر اس (مؤذن) کی آواز سنے گا، (قیامت کو) اس کے حق میں گواہی دے گا۔“” [سنن ابن ماجه/كتاب الأذان والسنة فيه/حدیث: 723]

حضرت ابوہریرہ رضی اللہ عنہ سے روایت ہے، انہوں نے کہا: میں نے رسول اللہ صلی اللہ علیہ وسلم کو فرماتے سنا ہے: ”مؤذن کی آواز جہاں تک پہنچتی ہے، وہاں تک اس کی مغفرت کر دی جاتی ہے، ہر تر اور خشک چیز اس کے حق میں دعائے مغفرت کرتی ہے اور (اذان سن کر) نماز کے لیے حاضر ہونے والے کے لیے پچیس نیکیاں لکھی جاتی ہیں، اور اس کے دو نمازوں کے درمیان گناہ معاف کر دیے جاتے ہیں۔“ [سنن ابن ماجه/كتاب الأذان والسنة فيه/حدیث: 724]

حضرت معاویہ بن ابوسفیان رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”قیامت کے دن مؤذنوں کی گردنیں سب سے لمبی ہوں گی۔“ [سنن ابن ماجه/كتاب الأذان والسنة فيه/حدیث: 725]

حضرت عبداللہ بن عباس رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”اذان وہ لوگ دیں جو زیادہ بہتر (نیک) ہوں، اور تمہیں نماز وہ افراد پڑھائیں جو قرآن پڑھنے والے (حافظ اور عالم) ہوں۔“ [سنن ابن ماجه/كتاب الأذان والسنة فيه/حدیث: 726]

حضرت عبداللہ بن عباس رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”جس نے ثواب کی نیت سے سات سال (مسلسل) اذان دی، اللہ تعالیٰ اس کے لیے جہنم سے نجات لکھ دیتا ہے۔“ [سنن ابن ماجه/كتاب الأذان والسنة فيه/حدیث: 727]

حضرت عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جو شخص بارہ برس تک اذان دیتا ہے، اس کے لیے جنت واجب ہو جاتی ہے، اور اس کے لیے روزانہ اذان کے عوض ساٹھ نیکیاں لکھی جاتی ہیں اور ہر اقامت کے عوض تیس نیکیاں لکھی جاتی ہیں۔“ [سنن ابن ماجه/كتاب الأذان والسنة فيه/حدیث: 728]