حضرت ابو حازم رضی اللہ عنہ سے روایت ہے، انہوں نے فرمایا: حضرت سہل بن سعد ساعدی رضی اللہ عنہ اپنے قبیلے کے نوجوانوں کو آگے بڑھاتے تھے کہ لوگوں کو نماز پڑھائیں۔ ان سے عرض کیا گیا: ”آپ ایسا کیوں کرتے ہیں حالانکہ آپ کو قدیم الاسلام صحابی ہونے کا شرف حاصل ہے؟“ انہوں نے فرمایا: ”میں نے رسول اللہ صلی اللہ علیہ وسلم سے سنا ہے، آپ صلی اللہ علیہ وسلم نے فرمایا: ”امام ذمہ دار ہے۔ اگر اچھے طریقے سے نماز پڑھائے تو اسے بھی ثواب ہو گا اور مقتدیوں کو بھی ثواب ہو گا، اور اگر اس نے غلطی کی تو وہ گناہ گار ہو گا، مقتدی گناہ گار نہیں ہوں گے۔“” [سنن ابن ماجه/كتاب إقامة الصلاة والسنة/حدیث: 981]

حضرت خرشہ رضی اللہ عنہ کی ہمشیرہ حضرت سلامہ بنت حر رضی اللہ عنہا سے روایت ہے، انہوں نے فرمایا: میں نے نبی صلی اللہ علیہ وسلم سے یہ ارشاد مبارک سنا ہے: ”لوگوں پر ایسا زمانہ بھی آئے گا کہ وہ ایک گھڑی کھڑے رہیں گے (ایک دوسرے کو امامت کے لیے دھکیلیں گے) انہیں کوئی امام نہیں ملے گا جو نماز پڑھا سکے۔“ [سنن ابن ماجه/كتاب إقامة الصلاة والسنة/حدیث: 982]

حضرت ابو علی ہمدانی رضی اللہ عنہ سے روایت ہے کہ وہ ایک کشتی میں سفر پر روانہ ہوئے۔ کشتی میں حضرت عقبہ بن عامر جہنی رضی اللہ عنہ بھی موجود تھے۔ (سفر کے دوران میں) نماز کا وقت ہو گیا، ہم نے ان سے درخواست کی کہ نماز پڑھا دیں اور ہم نے ان سے عرض کیا: ”آپ اس (امامت) کا زیادہ حق رکھتے ہیں کیوں کہ آپ رسول اللہ صلی اللہ علیہ وسلم کے صحابی ہیں“، انہوں نے انکار کر دیا اور فرمایا: ”میں نے رسول اللہ صلی اللہ علیہ وسلم سے یہ ارشاد مبارک سنا ہے: ”جو شخص لوگوں کا امام بنے اور صحیح طریقے سے نماز پڑھائے تو اسے بھی نماز کا ثواب ملے گا اور ان کو بھی۔ اور اگر اس نے نماز میں کوئی کوتاہی (اور غلطی) کی تو اسے گناہ ہو گا، انہیں نہیں۔““ [سنن ابن ماجه/كتاب إقامة الصلاة والسنة/حدیث: 983]