حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے نجاشی رضی اللہ عنہ کے فوت ہونے کی خبر سنائی جس دن وہ فوت ہوئے تھے، پھر آپ صلی اللہ علیہ وسلم عید گاہ تشریف لے گئے، صفیں درست کرنے کے بعد چار تکبیریں کہیں اور ان کی نمازِ جنازہ ادا کی۔ [صحيح البخاري/كِتَاب الْجَنَائِزِ/حدیث: 1245]

حضرت انس بن مالک رضی اللہ عنہ سے روایت ہے، انہوں نے کہا: نبی کریم صلی اللہ علیہ وسلم نے فرمایا: ”(جنگ موتہ میں) پہلے حضرت زید رضی اللہ عنہ نے جھنڈا اٹھایا اور وہ شہید ہو گئے۔ پھر حضرت جعفر رضی اللہ عنہ نے جھنڈا اٹھایا اور وہ بھی شہید ہو گئے۔ آخر میں حضرت عبداللہ بن رواحہ رضی اللہ عنہ نے جھنڈا اٹھایا تو وہ بھی شہید ہو گئے۔ اس وقت رسول اللہ صلی اللہ علیہ وسلم کی آنکھیں اشکبار تھیں۔ پھر حضرت خالد بن ولید رضی اللہ عنہ نے سالاری کے بغیر ہی جھنڈا اٹھایا تو ان کے ہاتھوں فتح ہوئی۔“ [صحيح البخاري/كِتَاب الْجَنَائِزِ/حدیث: 1246]