حضرت ثابت بن ضحاک رضی اللہ عنہ سے روایت ہے، وہ نبی کریم صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”جو شخص اسلام کے علاوہ کسی دوسرے مذہب کی دانستہ جھوٹی قسم اٹھائے تو وہ ویسا ہی ہوگا، جیسا اس نے کہا ہے اور جو شخص تیز ہتھیار سے خود کو مار ڈالے، اس کو اسی ہتھیار سے جہنم میں عذاب دیا جائے گا۔“ [صحيح البخاري/كِتَاب الْجَنَائِزِ/حدیث: 1363]

حضرت حسن بصری رحمہ اللہ سے روایت ہے، انہوں نے کہا: ہمیں حضرت جندب رضی اللہ عنہ نے اس مسجد میں حدیث بیان کی جسے ہم بھولے نہیں اور نہ ہمیں یہ اندیشہ ہی ہے کہ انہوں نے نبی کریم صلی اللہ علیہ وسلم پر جھوٹ بولا ہوگا۔ انہوں نے رسول اللہ صلی اللہ علیہ وسلم سے بیان کیا کہ آپ صلی اللہ علیہ وسلم نے فرمایا: ”ایک شخص کو زخم لگ گیا تھا، اس نے خود کو قتل کر ڈالا۔ تو اللہ تعالیٰ نے فرمایا: چونکہ میرے بندے نے مجھ سے سبقت چاہی، لہذا میں نے اس پر جنت کو حرام کر دیا ہے۔“ [صحيح البخاري/كِتَاب الْجَنَائِزِ/حدیث: 1364]

حضرت ابوہریرہ رضی اللہ عنہ سے روایت ہے، انہوں نے کہا: نبی کریم صلی اللہ علیہ وسلم نے فرمایا: ”جو خود اپنا گلا گھونٹ لے وہ دوزخ میں اپنا گلا گھونٹتا ہی رہے گا اور جو شخص نیزہ مار کر خود کشی کرے وہ دوزخ میں بھی خود کو نیزہ مارتا ہی رہے گا۔“ [صحيح البخاري/كِتَاب الْجَنَائِزِ/حدیث: 1365]