حضرت عبداللہ بن مسعود رضی اللہ عنہ بیان کرتے ہیں کہ ”بے شک میں ان ملتی جلتی بیس سورتوں کو بخوبی جانتا ہوں جنہیں رسول اللہ صلی اللہ علیہ وسلم دس رکعات میں پڑھتے تھے۔“ پھر وہ علقمہ رحمہ اللہ کا ہاتھ پکڑ کر اندر چلے گئے، پھر علقمہ رحمہ اللہ باہر آئے تو ہم نے ان سے ان سورتوں کے بارے میں پوچھا تو انہوں نے ہمیں ان کی تفصیل بتائی۔ [سنن نسائي/باب سجود القرآن/حدیث: 1005]

حضرت ابووائل رحمہ اللہ بیان کرتے ہیں کہ ایک آدمی نے حضرت عبداللہ بن مسعود رضی اللہ عنہ سے کہا: ”میں نے تمام مفصل سورتیں آج رات ایک رکعت میں پڑھ لیں۔“ آپ رضی اللہ عنہ نے فرمایا: ”شعر کی طرح تیز تیز کتر ڈالیں۔ اللہ عزوجل کی قسم! میں ان ملتی جلتی سورتوں کو بخوبی پہچانتا ہوں جنہیں اللہ کے رسول صلی اللہ علیہ وسلم ملا کر پڑھا کرتے تھے۔“ پھر انہوں نے مفصل سورتوں میں سے بیس سورتیں ذکر کیں، ہر رکعت میں دو دو سورتیں۔ [سنن نسائي/باب سجود القرآن/حدیث: 1006]

حضرت مسروق رحمہ اللہ حضرت عبداللہ بن مسعود رضی اللہ عنہ سے بیان کرتے ہیں کہ ایک آدمی ان کے پاس آیا اور کہنے لگا: ”تحقیق میں نے آج رات تمام مفصل سورتیں ایک رکعت میں پڑھ لیں۔“ انہوں نے فرمایا: ”تو نے اس طرح تیز تیز پڑھا ہوگا جیسے شعر پڑھے جاتے ہیں؟ لیکن اللہ کے رسول صلی اللہ علیہ وسلم تو ملتی جلتی بیس سورتیں (دس رکعتوں میں) پڑھتے تھے جو مفصل سے «حٰمۤ» والی سورتیں تھیں۔ (جن سورتوں کے شروع میں «حٰمۤ» ہے۔)“ [سنن نسائي/باب سجود القرآن/حدیث: 1007]