سیدنا تمیم داری رضی اللہ عنہ روایت کرتے ہیں، نبی کریم صلی اللہ علیہ وسلم نے ارشاد فرمایا ہے: ”دین خیر خواہی کا نام ہے۔ دین خیر خواہی کا نام ہے۔ دین خیر خواہی کا نام ہے۔“ لوگوں نے عرض کی: یا رسول اللہ! کس کے لئے؟ نبی کریم صلی اللہ علیہ وسلم نے فرمایا: ”اللہ تعالیٰ کے لئے، اس کی کتاب کے لئے، اس کے نبی کریم صلی اللہ علیہ وسلم کے لئے، مسلمان حکمرانوں کے لئے، ان کے عام افراد کے لئے۔“ [مسند الحميدي/حدیث: 859]

سفیان کہتے ہیں: عمرو بن دینار نے یہ روایت پہلے قعقاع بن حکیم کے حوالے سے ابوصالح سے نقل کی تھی، جب میری ملاقات سہیل سے ہوئی تو میں نے سوچا اگر میں ان سے اس روایت کے بارے میں دریافت کروں، تو ہو سکتا ہے، وہ اپنے والد کے حوالے سے یہ روایت مجھے سنا دیں، تو اس صورت میں، میں اور عمرو اس روایت کے بارے میں برابر کے مرتبے میں آ جائیں گے۔ میں نے ان سے اس روایت کے بارے میں دریافت کیا، تو سہیل بولے: میں نے یہ روایت ان صاحب سے سنی ہے جن سے میرے والد نے سنی ہے، انہوں نے عطاء بن یزید کے حوالے سے یہ روایت مجھے سنائی۔ [مسند الحميدي/حدیث: 860]