سیدنا عقبہ بن عامر رضی اللہ عنہ بیان کرتے ہیں: میں نبی کریم صلی اللہ علیہ وسلم کے ساتھ ایک گھاٹی سے نیچے اتر رہا تھا آپ صلی اللہ علیہ وسلم نے فرمایا: ”اے عقبہ! تم یہ پڑھو۔“ میں نے عرض کی: یا رسول اللہ! میں کیا پڑھوں۔ پھر ہم الگ ہو گئے: میں نے دعا کی: اے اللہ! تو اپنے نبی کریم صلی اللہ علیہ وسلم کی طرف سے وہ چیز مجھے لوٹا دے۔ پھر ہماری ملاقات ہوئی تو نبی کریم صلی اللہ علیہ وسلم نے فرمایا: ”اے عقبہ! تم پڑھو“ میں نے عرض کی: یا رسول اللہ! میں کیا پڑھوں؟ پھر ہم جدا ہو گئے میں نے عرض کی: اے اللہ! تو اپنے نبی کریم صلی اللہ علیہ وسلم کے ذریعے وہ چیز مجھ تک لوٹا دے۔ پھر ہماری ملاقات ہوئی تو نبی کریم صلی اللہ علیہ وسلم نے مجھ سے فرمایا: ”تم پڑھو! اے عقبہ!“ میں نے عرض کی: یا رسول اللہ! میں کیا پڑھوں؟ تو نبی کریم صلی اللہ علیہ وسلم نے فرمایا: ”تم سورہ اخلاص، سورہ فلق اور سورہ ناس پڑھو۔ کسی بھی پناہ مانگنے والے نے اور کسی بھی پناہ طلب کرنے والے نے ان کی مانند کلمات کے ذریعے کبھی پناہ نہیں مانگی ہوگی۔“ [مسند الحميدي/حدیث: 874]