سیدنا ابوہریرہ رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا کہ: ”جس نے جنازہ میں شرکت کی پھر نماز جنازہ پڑھی تو اسے ایک قیراط کا ثواب ملتا ہے اور جو دفن تک ساتھ رہا تو اسے دو قیراط کا ثواب ملتا ہے۔“ پوچھا گیا کہ دو قیراط کتنے ہوں گے؟ فرمایا کہ: ”دو عظیم پہاڑوں کے برابر۔“ (یعنی دنیا کا قیراط مت سمجھو جو درہم کا بارہواں حصہ ہوتا ہے، دوسری روایت میں ہے کہ آخرت کے قیراط احد پہاڑ کے برابر ہیں) [اللؤلؤ والمرجان/كتاب الجنائز/حدیث: 551]

سیدنا ابن عمر رضی اللہ عنہما نے کہا کہ سیدنا ابوہریرہ رضی اللہ عنہ نے بیان کیا کہ ”جو دفن تک جنازہ کے ساتھ رہے اسے ایک قیراط کا ثواب ملے گا“، پھر سیدنا ابن عمر رضی اللہ عنہما نے فرمایا کہ ابوہریرہ رضی اللہ عنہ احادیث بہت زیادہ بیان کرتے ہیں، پھر سیدنا ابوہریرہ رضی اللہ عنہ کی سیدہ عائشہ رضی اللہ عنہا نے بھی تصدیق کی اور فرمایا کہ میں نے رسول اللہ صلی اللہ علیہ وسلم سے یہ ارشاد خود سنا ہے، اس پر سیدنا ابن عمر رضی اللہ عنہما نے کہا کہ پھر تو ہم نے بہت سے قیراطوں کا نقصان اٹھایا۔ [اللؤلؤ والمرجان/كتاب الجنائز/حدیث: 552]

سیدنا انس بن مالک رضی اللہ عنہ سے روایت ہے کہ صحابہ کا گزر ایک جنازے پر ہوا، لوگ اس کی تعریف کرنے لگے (کہ کیا اچھا آدمی تھا) تو رسول اللہ صلی اللہ علیہ وسلم نے یہ سن کر فرمایا: «وَجَبَتْ» ”واجب ہو گئی۔“ پھر دوسرے جنازے کا گزر ہوا تو لوگ اس کی برائی کرنے لگے، نبی کریم صلی اللہ علیہ وسلم نے پھر فرمایا: «وَجَبَتْ» ”واجب ہو گئی۔“ اس پر سیدنا عمر بن خطاب رضی اللہ عنہ نے پوچھا کہ کیا چیز واجب ہو گئی؟ رسول اللہ صلی اللہ علیہ وسلم نے فرمایا: ”جس میت کی تم لوگوں نے تعریف کی ہے اس کے لیے تو جنت واجب ہو گئی اور جس کی تم نے برائی کی ہے اس کے لیے دوزخ واجب ہو گئی، تم لوگ زمین میں اللہ تعالیٰ کے گواہ ہو۔“ [اللؤلؤ والمرجان/كتاب الجنائز/حدیث: 553]

سیدنا ابوقتادہ بن ربعی انصاری رضی اللہ عنہ نے بیان کیا کہ نبی کریم صلی اللہ علیہ وسلم کے قریب سے لوگ ایک جنازہ لے کر گزرے تو رسول اللہ صلی اللہ علیہ وسلم نے فرمایا: ”اسے آرام مل گیا یا اس سے آرام مل گیا“۔ صحابہ کرام رضی اللہ عنہم نے عرض کیا: یا رسول اللہ! «مُسْتَرِيحٌ» اور «مُسْتَرَاحٌ مِنْهُ» کا کیا مطلب ہے؟ رسول اللہ صلی اللہ علیہ وسلم نے فرمایا: ”مومن بندہ دنیا کی مشقتوں اور تکلیفوں سے اللہ کی رحمت میں نجات پا جاتا ہے، وہ «مُسْتَرِيحٌ» ہے اور «مُسْتَرَاحٌ مِنْهُ» وہ ہے کہ فاجر بندے سے اللہ کے بندے، شہر، درخت اور چوپائے سب آرام پا جاتے ہیں“۔ [اللؤلؤ والمرجان/كتاب الجنائز/حدیث: 554]

سیدنا ابوہریرہ رضی اللہ عنہ نے بیان کیا کہ نجاشی کی وفات کی اسی دن خبر دے دی تھی جس دن ان کا انتقال ہوا تھا، آپ صلی اللہ علیہ وسلم نماز پڑھنے کی جگہ تشریف لے گئے، پھر صف بندی کر کے چار تکبیریں کہیں۔ [اللؤلؤ والمرجان/كتاب الجنائز/حدیث: 555]

سیدنا ابوہریرہ رضی اللہ عنہ نے روایت کیا کہ نبی کریم صلی اللہ علیہ وسلم نے ہمیں حبشہ کے نجاشی کی وفات کی خبر دی، اسی دن جس دن اس کا انتقال ہوا تھا، آپ صلی اللہ علیہ وسلم نے فرمایا: ”اپنے بھائی کے لیے خدا سے مغفرت چاہو۔“ [اللؤلؤ والمرجان/كتاب الجنائز/حدیث: 556]

سیدنا جابر رضی اللہ عنہ نے بیان کیا کہ نبی کریم صلی اللہ علیہ وسلم نے اصحمہ نجاشی کی نماز جنازہ پڑھائی تو چار تکبیریں کہیں۔ [اللؤلؤ والمرجان/كتاب الجنائز/حدیث: 557]

سیدنا جابر بن عبداللہ رضی اللہ عنہما نے فرمایا کہ نبی کریم صلی اللہ علیہ وسلم نے فرمایا: ”آج حبش کے ایک مردِ صالح (نجاشی حبش کا بادشاہ) کا انتقال ہو گیا ہے، آؤ اس کی نمازِ جنازہ پڑھو۔“ سیدنا جابر رضی اللہ عنہما نے بیان کیا کہ پھر ہم نے صف بندی کر لی اور نبی کریم صلی اللہ علیہ وسلم نے ان کی نمازِ جنازہ پڑھائی اور ہم صف باندھے کھڑے تھے۔ [اللؤلؤ والمرجان/كتاب الجنائز/حدیث: 558]

سلیمان شیبانی رحمہ اللہ روایت کرتے ہیں، سیدنا شعبی رحمہ اللہ نے بیان کیا کہ مجھے ایک ایسے شخص نے خبر دی جو (ایک مرتبہ) نبی کریم صلی اللہ علیہ وسلم کے ساتھ ایک اکیلی الگ تھلگ ٹوٹی ہوئی قبر پر سے گزر رہے تھے، وہاں رسول اللہ صلی اللہ علیہ وسلم نے نماز پڑھائی اور لوگ آپ صلی اللہ علیہ وسلم کے پیچھے صف باندھے ہوئے تھے۔ سلیمان نے کہا کہ میں نے شعبی سے پوچھا کہ اے ابو عمرو! آپ سے یہ کس نے بیان کیا؟ تو انہوں نے کہا کہ سیدنا ابن عباس رضی اللہ عنہما نے۔ [اللؤلؤ والمرجان/كتاب الجنائز/حدیث: 559]

سیدنا ابوہریرہ رضی اللہ عنہ نے بیان کیا کہ کالے رنگ کا ایک مرد یا کالی عورت مسجد کی خدمت کیا کرتی تھی، اس کی وفات ہو گئی لیکن نبی کریم صلی اللہ علیہ وسلم کو اس کی وفات کی خبر کسی نے نہ دی، ایک دن آپ صلی اللہ علیہ وسلم نے خود یاد فرمایا کہ ”وہ شخص دکھائی نہیں دیتا“، صحابہ رضی اللہ عنہم نے کہا کہ یا رسول اللہ! اس کا تو انتقال ہو گیا، آپ صلی اللہ علیہ وسلم نے فرمایا: ”پھر تم نے مجھے خبر کیوں نہیں دی؟“ صحابہ رضی اللہ عنہم نے عرض کیا کہ یہ یہ وجہ تھی (اس لیے آپ کو تکلیف نہیں دی گئی) گویا لوگوں نے اس کو حقیر جان کر قابلِ توجہ نہیں سمجھا، لیکن آپ صلی اللہ علیہ وسلم نے فرمایا: ”مجھے اس کی قبر بتا دو“، چنانچہ آپ صلی اللہ علیہ وسلم اس کی قبر پر تشریف لائے اور اس پر نمازِ جنازہ پڑھی۔ [اللؤلؤ والمرجان/كتاب الجنائز/حدیث: 560]