حضرت حسن اور حضرت ابن سیرین فرماتے ہیں کہ جب تو پالے تو روزہ مت رکھ۔ [مصنف ابن ابي شيبه/كتاب الأيمان والنذور والكفارات/حدیث: 12970]

حضرت عامر بن مصعب سے مروی ہے کہ حضرت عائشہ رضی اللہ عنہا نے اپنے بھائی کی وفات کے بعد اس کی جگہ اعتکاف کیا۔ [مصنف ابن ابي شيبه/كتاب الأيمان والنذور والكفارات/حدیث: 12971]

حضرت لیث فرماتے ہیں کہ حضرت طاؤس سے ایک عورت کے متعلق سوال کیا گیا جو فوت ہوگئی اور اس کے ذمہ مسجد حرام میں ایک سال کا اعتکاف تھا، اور اس کے چار بیٹے تھے جن میں سے ہر ایک چاہتا تھا کہ اس کی طرف سے قضا کرے، حضرت طاؤس نے فرمایا: تم چاروں مسجد حرام میں تین مہینے اعتکاف کرو اور روزے رکھو۔ [مصنف ابن ابي شيبه/كتاب الأيمان والنذور والكفارات/حدیث: 12972]

حضرت عبید اللہ بن عبد اللہ بن عتبہ سے مروی ہے کہ ایک عورت نے نذر مانی تھی کہ وہ دس دن اعتکاف کرے گی اور وہ فوت ہوگئی ہے اعتکاف نہیں کرسکی، حضرت ابن عباس رضی اللہ عنہما نے فرمایا: اپنی والدہ کی طرف سے اعتکاف کر۔ [مصنف ابن ابي شيبه/كتاب الأيمان والنذور والكفارات/حدیث: 12973]

حضرت ابراہیم فرماتے ہیں کہ میت کی طرف سے اعتکاف کی قضا نہیں کی جائے گی۔ [مصنف ابن ابي شيبه/كتاب الأيمان والنذور والكفارات/حدیث: 12974]

حضرت طاؤس میت پر نذر کے متعلق فرماتے ہیں اس کے ورثاء آپس میں (بانٹ کر) اس کو ادا کریں گے اور اگر کسی شخص کے ذمہ سال کے روزے ہوں تو اگر ورثاء چاہیں تو روزے رکھ لیں، ورثاء میں سے ہر کوئی تین مہینے رکھے گا۔ [مصنف ابن ابي شيبه/كتاب الأيمان والنذور والكفارات/حدیث: 12975]

حضرت حسن ناپسند فرماتے تھے کہ کوئی شخص کفارہ یمین میں قربانی کا گوشت مساکین کو کھلائے۔ [مصنف ابن ابي شيبه/كتاب الأيمان والنذور والكفارات/حدیث: 12976]

ابراہیم سے مروی ہے کہ اگر ایک شخص دوسرے شخص کے بارے میں کہے کہ وہ اسے اپنی آنکھوں کی پلکوں پر ھدیہ کرے گا، تو وہ اسے حج کروائے اور ایک بدنہ (اونٹ یا گائے) ذبح کرے۔ [مصنف ابن ابي شيبه/كتاب الأيمان والنذور والكفارات/حدیث: 12977]

حضرت شعبی سے سوال کیا گیا کہ ایک عورت نے قسم کھائی کہ وہ ایسی تمام چیزیں ھدیہ کر دے گی جو اس کی خادمہ تیار کرے تو کیا اس کی قسم کو توڑنے سے بچانے کا کوئی راستہ ہے؟ اس چیز کو بیچ دے۔ [مصنف ابن ابي شيبه/كتاب الأيمان والنذور والكفارات/حدیث: 12978]

حضرت عطاء سے دریافت کیا گیا کہ کوئی شخص رمضان کے چند دن افطار کرے آپ نے فرمایا اس پر ہر دن کے بدلہ کفارہ ہے۔ [مصنف ابن ابي شيبه/كتاب الأيمان والنذور والكفارات/حدیث: 12979]