حضرت مجاہد اور حضرت طاؤس اس شخص کے متعلق فرماتے ہیں کہ جو طواف واجب کے بعد دو رکعتیں ادا کرنا بھول جائے، فرماتے ہیں کہ اگر اس کے بعد وہ کوئی نماز ادا کرلے تو اس کی طرف سے کافی ہوجائے گا، اور اگر وہ حرم کے قریب ترین حصے میں یا دور ترین حصے میں ادا کرے تو بھی کافی ہے، اور اگر وہ نماز ادا کیے بغیر حرم سے باہر نکل گیا تو پھر اس کو قربانی کرنا پڑے گی۔ [مصنف ابن ابي شيبه/كتاب الحج/حدیث: 15181]

حضرت عطاء اس شخص کے متعلق فرماتے ہیں جو طواف کرنے کے بعد دو رکعتیں ادا کرنا بھول جائے، فرماتے ہیں کہ جب اس کو یاد آئے وہ ادا کرے اس پر کچھ نہیں ہے۔ [مصنف ابن ابي شيبه/كتاب الحج/حدیث: 15182]

حضرت حسن اس شخص کے متعلق فرماتے ہیں کہ جو طواف کے بعد دو رکعتیں ادا کرنا بھول جائے، فرمایا اس کو جہاں بھی یاد آئے وہ پڑھ لے جب تک وہ عورت کے قریب نہ آیا ہو۔ [مصنف ابن ابي شيبه/كتاب الحج/حدیث: 15183]

حضرت سعید بن جبیر حلق کرنے والوں کو فرماتے کہ حلق کو دونوں ہڈیوں تک پہنچاؤ۔ [مصنف ابن ابي شيبه/كتاب الحج/حدیث: 15184]

حضرت ابن عمر رضی اللہ عنہما حلق کرنے والوں کو فرماتے کہ جب حج وعمرہ میں حلق کرو تو دونوں ہڈیوں تک حلق کرو۔ [مصنف ابن ابي شيبه/كتاب الحج/حدیث: 15185]

حضرت ابن عباس رضی اللہ عنہما حلق کرنے والوں کو فرماتے تھے کہ دائیں جانب سے حلق شروع کرو اور دونوں ہڈیوں تک حلق کرو۔ [مصنف ابن ابي شيبه/كتاب الحج/حدیث: 15186]

حضرت علی الازدی فرماتے ہیں کہ حضرت ابن عمر رضی اللہ عنہما نے قربانی کی اور سر کا حلق کروایا، میں نے سنا وہ حلق کرنے والوں سے فرما رہے تھے کہ حلق دو ہڈیوں تک کرو۔ [مصنف ابن ابي شيبه/كتاب الحج/حدیث: 15187]

حضرت ابن جریج کہتے ہیں کہ میں نے حضرت عطاء سے پوچھا کہ کیا آپ نے خود سنا ہے کہ وہ حلق کے بارے میں یہ کہتے تھے کہ دونوں ہڈیوں تک حلق کرو؟ آپ نے فرمایا کہ میں نے لوگوں سے سنا ہے وہ اس کا ذکر کرتے ہیں لیکن میں نے کسی معتبر (ثقہ) شخص سے نہیں سنا۔ [مصنف ابن ابي شيبه/كتاب الحج/حدیث: 15188]

حضرت ابو جعفر فرماتے ہیں کہ ہڈیوں تک حلق کرو۔ [مصنف ابن ابي شيبه/كتاب الحج/حدیث: 15189]

حضرت عطاء فرماتے ہیں کہ سنت طریقہ یہ ہے کہ حلق دونوں ہڈیوں تک ہو۔ [مصنف ابن ابي شيبه/كتاب الحج/حدیث: 15190]