ہشام بن عروہ اپنے والد کے حوالے سے یہ بات نقل کرتے ہیں کہ سیدنا زبیر رضی اللہ عنہ نے یہ بات بیان کی ہے کہ یہ آیت ہمارے بارے میں نازل ہوئی: ”اور نسبی رشتے دار ایک دوسرے کے وارث بنیں گے (اللہ کی کتاب میں یہی حکم ہے)۔“ نبی کریم صلی اللہ علیہ وسلم نے دو مہاجرین اور ایک انصاری کو ایک دوسرے کا بھائی بنا دیا تھا تو ہمیں اس بارے میں کوئی شبہ نہیں تھا کہ ہم ایک دوسرے کے وارث بنیں گے، یعنی اگر سیدنا کعب رضی اللہ عنہ کا انتقال ہو جاتا اور ان کا کوئی وارث نہ ہوتا تو میرا یہ خیال تھا کہ میں ان کا وارث بنتا اور اگر میں مر جاتا تو اسی طرح وہ میرے وارث بنتے یہاں تک کہ یہ آیت نازل ہو گئی۔ [سنن الدارقطني/ كتاب الفرائض/حدیث: 4158]

سیدنا ابوہریرہ رضی اللہ عنہ بیان کرتے ہیں کہ نبی کریم صلی اللہ علیہ وسلم سے پھوپھی اور خالہ کی وراثت کے بارے میں دریافت کیا گیا، تو آپ نے فرمایا کہ: ”مجھے اس بارے میں علم نہیں ہے، جبرائیل علیہ السلام مجھے آ کر (اس بارے میں بتا دیں گے)۔“ پھر آپ نے ارشاد فرمایا: ”پھوپھی اور خالہ کی وراثت کے بارے میں دریافت کرنے والے شخص کہاں ہے؟“ اس شخص کو لایا گیا، تو آپ نے ارشاد فرمایا: ”جبرائیل علیہ السلام نے مجھے یہ بات بتائی ہے کہ ان دونوں کو کوئی چیز نہیں ملے گی (یعنی یہ وارث نہیں بنیں گی)۔“ اس روایت کو محمد بن عمرو کے حوالے سے صرف مسعدہ نامی راوی نے نقل کیا ہے اور یہ راوی ضعیف ہے، درست یہ ہے کہ یہ روایت ”مرسل“ ہے۔ [سنن الدارقطني/ كتاب الفرائض/حدیث: 4159]

یہی روایت ایک اور سند کے ہمراہ نبی کریم صلی اللہ علیہ وسلم سے منقول ہے۔ [سنن الدارقطني/ كتاب الفرائض/حدیث: 4160]

شعبی بیان کرتے ہیں: زیاد بن ابوسفیان نے اپنے ساتھی سے کہا: ”کیا تم جانتے ہو کہ سیدنا عمر رضی اللہ عنہ نے پھوپھی اور خالہ کے بارے میں کیا فیصلہ دیا تھا؟“ اس شخص نے جواب دیا: ”جی نہیں!“ تو زیاد نے کہا: ”میں اس بارے میں سب سے بہتر جانتا ہوں کہ سیدنا عمر رضی اللہ عنہ نے اس بارے میں کیا فیصلہ دیا تھا، انہوں نے خالہ کو ماں کی جگہ اور پھوپھی کو باپ کی جگہ قرار دیا تھا۔“ [سنن الدارقطني/ كتاب الفرائض/حدیث: 4161]