سیدنا سعید بن مسیب رحمہ اللہ سے روایت ہے کہ سیدنا ابو بکر رضی اللہ عنہ اور سیدنا عمر رضی اللہ عنہ نے رسول اللہ صلی اللہ علیہ وسلم کے پاس اپنے اپنے وتر پڑھنے کا طریقہ ذکر کیا سیدنا ابوبکر رضی اللہ عنہ کہنے لگے کہ ”میں رات کے پہلے پہر ہی وتر پڑھ لیتا ہوں“، سیدنا عمر رضی اللہ عنہ نے فرمایا: کہ ”میں رات کے آخری پہر وتر پڑھتا ہوں“ تو نبی اکرم صلی اللہ علیہ وسلم نے سیدنا ابو بکر رضی اللہ عنہ کو خبر دار کیا اور سیدنا عمر رضی اللہ عنہ کی تائید کی۔ [السنن المأثورة - الإمام الشافعي/باب من أوتر من أول الليل وآخره/حدیث: 171]

ام المومنین سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے رات کے ہر حصہ میں وتر پڑھا ہے (لیکن) آخری امر یہی تھا کہ سحری کے وقت وتر پڑھتے تھے۔ [السنن المأثورة - الإمام الشافعي/باب من أوتر من أول الليل وآخره/حدیث: 172]

سیدنا سعید بن مسیب رحمہ اللہ سے روایت ہے کہ رسول اللہ صلی اللہ علیہ وسلم نے سیدنا ابو بکر رضی اللہ عنہ سے پوچھا: ”آپ وتر کب پڑھتے ہیں؟“ سیدنا ابو بکر رضی اللہ عنہ نے عرض کیا: ”سونے سے پہلے پڑھ لیتا ہوں“ یا کہا ”رات کے پہلے حصے میں پڑھتا ہوں“ اور آپ صلی اللہ علیہ وسلم نے سیدنا عمر رضی اللہ عنہ سے پوچھا: ”عمر رضی اللہ عنہ تم کب پڑھتے ہو؟“ سیدنا عمر رضی اللہ عنہ نے فرمایا: ”رات کے آخری پہر“ آپ صلی اللہ علیہ وسلم نے فرمایا: ”کیا میں تمہیں ایک مثال نہ بیان کروں؟ ابو بکر رضی اللہ عنہ تمہاری مثال اس شخص کی طرح ہے جس نے کہا ”میں نے اپنا حصہ بچا لیا ہے“ یعنی میں نے سونے سے پہلے جو واجب کام تھا کر دیا اگر آنکھ کھلی تو نوافل بھی پڑھ لوں گا اور اے عمر رضی اللہ عنہ یہ تو نے مضبوط لوگوں والا عمل کیا۔“ [السنن المأثورة - الإمام الشافعي/باب من أوتر من أول الليل وآخره/حدیث: 173]

سیدنا سہل بن ابی حثمہ رضی اللہ عنہ بیان فرماتے ہیں کہ رسول اللہ صلی اللہ علیہ وسلم نے فرمایا: ”جب تم آگے سترہ رکھ کر نماز پڑھو تو اس کے قریب کھڑے ہو (تا کہ) شیطان نماز توڑ نہ دے۔“ [السنن المأثورة - الإمام الشافعي/باب من أوتر من أول الليل وآخره/حدیث: 174]