حضرت عبداللہ بن عباس رضی اللہ عنہما سے روایت ہے، انہوں نے کہا کہ جب نبی صلی اللہ علیہ وسلم مدینہ طیبہ تشریف لائے تو یہودِ مدینہ عاشوراء کا روزہ رکھتے تھے۔ انہوں نے بتایا کہ یہ وہ دن ہے جس میں حضرت موسیٰ علیہ السلام کو فرعون پر فتح ملی تھی۔ نبی صلی اللہ علیہ وسلم نے اپنے صحابہ سے فرمایا: ”تم لوگ حضرت موسیٰ علیہ السلام سے ان کی نسبت زیادہ تعلق دار ہو، اس لیے تم بھی روزہ رکھو۔“ [صحيح البخاري/كتاب تفسير القرآن/حدیث: 4680]

محمد بن عباد بن جعفر سے روایت ہے، انہوں نے حضرت ابن عباس رضی اللہ عنہما کو سنا، وہ آیت کی قراءت اس طرح کرتے تھے: ﴿أَلَا إِنَّهُمْ تَثْنَوْنِي صُدُورُهُمْ﴾ [سورة هود: 5] میں نے ان سے اس کے متعلق پوچھا تو انہوں نے فرمایا: ”کچھ لوگ اس میں شرم کرنے لگے کہ آسمان کی طرف اپنا ستر کھول کر قضائے حاجت کریں اور شرماتے تھے کہ ستر کھول کر اپنی بیویوں سے جماع کریں، تو ایسے لوگوں کے متعلق یہ آیت نازل ہوئی۔“ [صحيح البخاري/كتاب تفسير القرآن/حدیث: 4681]

محمد بن عباد بن جعفر سے روایت ہے کہ حضرت ابن عباس رضی اللہ عنہما نے اس طرح قراءت کی: ﴿أَلَا إِنَّهُمْ تَثْنَوْنِي صُدُورُهُمْ﴾ [سورة هود: 5] میں نے کہا: ”اے ابو العباس! «تَثْنَوْنِي صُدُورُهُمْ» سے کیا مراد ہے؟“ انہوں نے فرمایا: ”آدمی اپنی بیوی سے جماع کرتا تو شرم کرتا، یا قضائے حاجت کرتا تو شرم کرتا، تو یہ آیت نازل ہوئی: ﴿أَلَا إِنَّهُمْ تَثْنَوْنِي صُدُورُهُمْ﴾ “ [صحيح البخاري/كتاب تفسير القرآن/حدیث: 4682]

حضرت عمرو بن دینار سے روایت ہے کہ حضرت عبداللہ بن عباس رضی اللہ عنہما نے اس آیت کی قراءت اس طرح کی تھی: ﴿أَلَا إِنَّهُمْ يَثْنُونَ صُدُورَهُمْ لِيَسْتَخْفُوا مِنْهُ أَلَا حِينَ يَسْتَغْشُونَ ثِيَابَهُمْ﴾ [سورة هود: 5] ۔ عمرو بن دینار کے علاوہ دوسروں نے حضرت عبداللہ بن عباس رضی اللہ عنہما سے بیان کیا کہ «يَسْتَغْشُونَ» کے معنی ہیں: ”وہ اپنے سروں کو چھپا لیتے ہیں۔“ ﴿سِيءَ بِهِمْ﴾ [سورة هود: 77] کے معنی ہیں: ”وہ اپنی قوم سے بدگمان ہوئے۔“ ﴿وَضَاقَ بِهِمْ﴾ [سورة هود: 77] کے معنی ہیں: ”اور وہ اپنے مہمانوں کی وجہ سے بہت پریشان اور دل گرفتہ ہوئے۔“ ﴿بِقِطْعٍ مِّنَ اللَّيْلِ﴾ [سورة هود: 81] کے معنی ہیں: ”رات کی سیاہی میں۔“ مجاہد رحمہ اللہ نے کہا: ﴿أُنِيبُ﴾ [سورة هود: 88] کے معنی ہیں: ”میں رجوع کرتا ہوں۔“ [صحيح البخاري/كتاب تفسير القرآن/حدیث: 4683]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اللہ تعالیٰ نے فرمایا: اے آدم کے بیٹے! تو خرچ کر، میں بھی تجھ پر خرچ کروں گا۔“ مزید فرمایا: ”اللہ کا ہاتھ بھرا ہوا ہے، رات اور دن مسلسل خرچ کرنے سے بھی اس میں کوئی کمی نہیں آتی۔“ فرمایا: ”تم نے دیکھا نہیں کہ جب سے اللہ تعالیٰ نے آسمان و زمین کو پیدا کیا ہے مسلسل خرچ کیے جا رہا ہے، اس کے باوجود جو کچھ اس کے ہاتھ میں ہے اس میں کمی نہیں آئی، اس کا عرش پانی پر تھا، اس کے ہاتھ میں میزانِ عدل ہے جسے وہ جھکاتا اور اٹھاتا ہے۔“ «اعْتَرَاكَ» بابِ افتعال ہے، «عَرَوْتُهُ» سے ماخوذ ہے جس کے معنی ہیں: ”میں نے اس کو مبتلائے مصیبت کیا۔“ «يَعْرُوهُ» اور «اعْتَرَانِي» بھی اسی سے ہے۔ ﴿آخِذٌۢ بِنَاصِيَتِهَا﴾ [سورة هود: 56] : تمام چلنے والوں کی چوٹی اس کے ہاتھ میں ہے، یعنی سب اس کے قبضے اور اس کی حکومت میں ہیں۔ ﴿عَنِيدٍ﴾ [سورة هود: 59] ، «عَنُودٍ» اور «عَانِدٍ» سب کے ایک ہی معنی ہیں، یعنی سرکش اور مخالف، یہ جبار کی تاکید ہے۔ ﴿وَيَقُولُ الْأَشْهَادُ﴾ [سورة هود: 18] اور گواہ (فرشتے) کہیں گے، «أَشْهَادٌ» کی واحد «شَاهِدٌ» ہے جس طرح «أَصْحَابٌ» کی واحد «صَاحِبٌ» ہے۔ ﴿اسْتَعْمَرَكُمْ﴾ [سورة هود: 61] : تمہیں آباد کیا۔ عرب کہتے ہیں: «أَعْمَرْتُهُ الدَّارَ فَهِيَ عُمْرَى»، یعنی ”میں نے یہ گھر اس کو عمر بھر کے لیے دے دیا، یہ عمریٰ ہے، یعنی اس کے لیے ہبہ ہے۔“ «نَكِرَهُمْ»، «أَنْكَرَهُمْ» اور «اسْتَنْكَرَهُمْ» کے معنی ایک ہی ہیں، یعنی حضرت ابراہیم علیہ السلام نے ان فرشتوں کو اجنبی خیال کیا۔ «حَمِيدٌ مَجِيدٌ» ﴿حَمِيدٌ مَجِيدٌ﴾ [سورة هود: 73] ، «حَمِيدٌ» فعیل کے وزن پر ہے، بمعنی محمود، یہ حمد سے ماخوذ ہے اور «مَجِيدٌ» فعیل بمعنی فاعل ہے، اس کے معنی ہیں ماجد، یعنی کرم کرنے والا۔ «سِجِّيلٍ» ﴿سِجِّيلٍ﴾ [سورة هود: 82] اور «سِجِّينٍ» دونوں کے معنی ایک ہیں، یعنی بڑا اور سخت، لام اور نون دونوں بہنیں ہیں، (ایک دوسرے سے بدل جاتی ہیں) جیسا کہ تمیم بن مقبل شاعر نے کہا ہے: ”بہت سے پیدل چلنے والے چاشت کے وقت سروں پر ایسی مار مارتے ہیں کہ بہادر اور سخت آدمی اس کی وصیت کرتا ہے۔“ [صحيح البخاري/كتاب تفسير القرآن/حدیث: 4684]