آلِ خطاب میں سے ایک آدمی نے نبی صلی ‌اللہ ‌علیہ ‌وآلہ ‌وسلم سے روایت کیا، آپ صلی ‌اللہ ‌علیہ ‌وآلہ ‌وسلم نے فرمایا: ”جو شخص قصداً میری زیارت کے لیے آئے تو روزِ قیامت وہ میرے پڑوس میں ہوگا، جو شخص مدینہ میں سکونت اختیار کرے اور اس کی مشکلات پر صبر کرے تو روزِ قیامت میں اس کے لیے گواہ بنوں گا یا سفارشی ہوں گا، اور جو حرمین (مکہ، مدینہ) میں کسی جگہ فوت ہوا تو روزِ قیامت وہ امن والوں میں سے ہوگا۔“ اسنادہ ضعیف، رواہ البیہقی فی شعب الایمان۔ [مشكوة المصابيح/كتاب المناسك/حدیث: 2755]

ابن عمر رضی اللہ عنہما مرفوع روایت بیان کرتے ہیں کہ نبی کریم صلی ‌اللہ ‌علیہ ‌وآلہ ‌وسلم نے فرمایا: ”جو شخص حج کرے اور میری موت کے بعد میری قبر کی زیارت کرے تو وہ اس شخص کی طرح ہے جس نے میری زندگی میں میری زیارت کی۔“ امام بیہقی رحمہ اللہ نے دونوں روایتیں شعب الایمان میں روایت کی ہیں۔ «إِسْنَادُهُ ضَعِيفٌ جِدًّا، رَوَاهُ الْبَيْهَقِيُّ فِي شُعَبِ الْإِيمَانِ» ۔ [مشكوة المصابيح/كتاب المناسك/حدیث: 2756]

یحییٰ بن سعید رحمہ اللہ سے روایت ہے کہ رسول اللہ صلی ‌اللہ ‌علیہ ‌وآلہ ‌وسلم بیٹھے ہوئے تھے جبکہ مدینہ میں ایک قبر کھودی جا رہی تھی، ایک آدمی نے قبر میں جھانکا تو کہا: مومن کی بہت بری جگہ ہے، تو رسول اللہ صلی ‌اللہ ‌علیہ ‌وآلہ ‌وسلم نے فرمایا: ”تم نے بہت بری بات کی ہے۔“ اس آدمی نے عرض کیا: میرا یہ ارادہ نہیں تھا، میں نے تو یہ ارادہ کیا کہ اللہ کی راہ میں شہادت (بستر پر مرنے سے) افضل ہے۔ رسول اللہ صلی ‌اللہ ‌علیہ ‌وآلہ ‌وسلم نے فرمایا: ”اللہ کی راہ میں شہادت جیسی تو کوئی چیز ہی نہیں اور مجھے اپنی قبر کے لیے یہ خطۂ زمین پوری زمین میں سب سے زیادہ پسندیدہ ہے۔“ آپ نے یہ بات تین مرتبہ فرمائی۔ امام مالک رحمہ اللہ نے اسے مرسل روایت کیا ہے۔ اسنادُہُ ضعیفٌ، رواہ مالک۔ [مشكوة المصابيح/كتاب المناسك/حدیث: 2757]

ابن عباس رضی اللہ عنہما بیان کرتے ہیں، عمر بن خطاب رضی اللہ عنہ نے بیان فرمایا: میں نے رسول اللہ صلی ‌اللہ ‌علیہ ‌وآلہ ‌وسلم کو وادیِ عقیق میں فرماتے ہوئے سنا: ”آج رات میرے رب کی طرف سے ایک آنے والا میرے پاس آیا تو اس نے کہا: اس مبارک وادی میں نماز پڑھیں، اور کہیں: عمرہ حج میں داخل ہو گیا“، ایک دوسری روایت میں ہے: ”آپ صلی ‌اللہ ‌علیہ ‌وآلہ ‌وسلم فرمائیں: عمرہ اور حج کی ایک ساتھ نیت کی“۔ رواہ البخاری۔ [مشكوة المصابيح/كتاب المناسك/حدیث: 2758]