اور امام دارمی رحمہ اللہ نے اسے ابن عباس رضی اللہ عنہما سے روایت کیا ہے۔ صحیح، رواہ الدارمی۔ [مشكوة المصابيح/كتاب الصيد والذبائح/حدیث: 4124]

سفینہ رضی اللہ عنہ بیان کرتے ہیں، میں نے رسول اللہ صلی ‌اللہ ‌علیہ ‌وآلہ ‌وسلم کے ساتھ سرخاب کا گوشت کھایا۔ «إِسْنَادُهُ ضَعِيفٌ، رَوَاهُ أَبُو دَاوُدَ» ”اس کی سند ضعیف ہے، اسے ابوداؤد نے روایت کیا ہے“۔ [مشكوة المصابيح/كتاب الصيد والذبائح/حدیث: 4125]

ابن عمر رضی اللہ عنہما بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے ”گندگی کھانے والے جانور کے کھانے اور اس کے دودھ (پینے) سے منع فرمایا ہے۔“ ترمذی۔ اور ابوداؤد کی روایت میں ہے: آپ صلی ‌اللہ ‌علیہ ‌وآلہ ‌وسلم نے ”غلاظت کھانے والے جانور کی سواری سے منع فرمایا ہے۔“ حسن، رواہ الترمذی وابوداؤد۔ [مشكوة المصابيح/كتاب الصيد والذبائح/حدیث: 4126]

عبدالرحمٰن بن شبل رضی اللہ عنہ سے روایت ہے کہ نبی صلی ‌اللہ ‌علیہ ‌وآلہ ‌وسلم نے ”سانڈے کے گوشت کو کھانے سے منع فرمایا ہے“۔ «إِسْنَادُهُ حَسَنٌ، رَوَاهُ أَبُو دَاوُدَ» ”اس کی سند حسن ہے، اسے ابوداؤد نے روایت کیا ہے“۔ [مشكوة المصابيح/كتاب الصيد والذبائح/حدیث: 4127]

جابر رضی اللہ عنہ سے روایت ہے کہ نبی صلی ‌اللہ ‌علیہ ‌وآلہ ‌وسلم نے ”بلی کے گوشت اور اس کی قیمت کھانے سے منع فرمایا ہے۔“ صحیح، رواہ ابوداؤد والترمذی۔ [مشكوة المصابيح/كتاب الصيد والذبائح/حدیث: 4128]

جابر رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم نے خیبر کے روز ”پالتو گدھوں اور خچروں کے گوشت سے، کچلی والے درندوں اور پنجے سے شکار کرنے والے پرندوں کے گوشت سے منع فرمایا ہے“۔ امام ترمذی رحمہ اللہ نے فرمایا کہ یہ حدیث غریب ہے۔ صحیح، رواہ الترمذی۔ [مشكوة المصابيح/كتاب الصيد والذبائح/حدیث: 4129]

خالد بن ولید رضی اللہ عنہ سے روایت ہے کہ رسول اللہ صلی ‌اللہ ‌علیہ ‌وآلہ ‌وسلم نے ”گھوڑوں، خچروں اور گدھوں کے گوشت کھانے سے منع فرمایا ہے“۔ «إِسْنَادُهُ ضَعِيفٌ» ”اسنادہ ضعیف“، «رَوَاهُ أَبُو دَاوُدَ وَالنَّسَائِيُّ» ”رواہ ابوداؤد و النسائی“۔ [مشكوة المصابيح/كتاب الصيد والذبائح/حدیث: 4130]

خالد بن ولید رضی اللہ عنہ بیان کرتے ہیں، میں نے غزوہ خیبر میں نبی صلی ‌اللہ ‌علیہ ‌وآلہ ‌وسلم کے ساتھ شرکت کی، یہود (آپ صلی ‌اللہ ‌علیہ ‌وآلہ ‌وسلم کی خدمت میں) آئے اور انہوں نے شکایت کی کہ لوگوں نے ان کے پھل دار درختوں سے پھل اتارنے میں بہت جلدی کی ہے، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”سن لو! ذمیوں سے ناحق مال لینا حلال نہیں۔“ «إِسْنَادُهُ ضَعِيفٌ» ”اس کی سند ضعیف ہے“، «رَوَاهُ أَبُو دَاوُدَ» ”اسے ابوداؤد نے روایت کیا ہے“۔ [مشكوة المصابيح/كتاب الصيد والذبائح/حدیث: 4131]

ابن عمر رضی اللہ عنہما بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”ہمارے لیے دو مردہ چیزیں اور دو خون حلال کیے گئے ہیں، دو مردار مچھلی اور ٹڈی ہیں، جبکہ دو خون جگر اور تلی ہیں۔“ ضعیف، رواہ احمد وابن ماجہ والدارقطنی۔ [مشكوة المصابيح/كتاب الصيد والذبائح/حدیث: 4132]

ابو زبیر رحمہ اللہ، جابر رضی اللہ عنہ سے روایت کرتے ہیں، انہوں نے کہا، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جس چیز کو سمندر باہر (ساحل کی طرف) پھینک دے اور اس سے پانی اتر جائے تو اسے کھاؤ، اور جو اس میں مر جائے اور سطح سمندر پر تیرنے لگے تو اسے مت کھاؤ۔“ ابوداؤد، ابن ماجہ۔ اسنادہ ضعیف، رواہ ابوداؤد و ابن ماجہ۔ امام محی السنہ رحمہ اللہ نے فرمایا: اکثر کا یہ موقف ہے کہ یہ روایت جابر رضی اللہ عنہ پر موقوف ہے۔ [مشكوة المصابيح/كتاب الصيد والذبائح/حدیث: 4133]