حضرت سالم رضی اللہ عنہ نے کہا کہ حضرت عبداللہ بن عمر رضی اللہ عنہما نے بیان کیا کہ رسول اللہ صلی اللہ علیہ وسلم لوگوں کے مجمعے میں کھڑے ہوئے اور اللہ تعالیٰ کی شایانِ شان تعریف کرنے کے بعد آپ صلی اللہ علیہ وسلم نے دجال کا ذکر کیا اور فرمایا: ”میں تمہیں اس کے بارے میں خبردار کرتا ہوں اور کوئی نبی ایسا نہیں گزرا جس نے اپنی قوم کو اس سے متنبہ نہ کیا ہو۔ بلاشبہ حضرت نوح علیہ السلام نے بھی اپنی قوم کو اس سے ڈرایا تھا لیکن میں تمہیں اس کی ایک ایسی نشانی بتاتا ہوں جو کسی نبی نے اپنی قوم کو نہیں بتائی، یقین کرو کہ دجال کانا ہوگا جبکہ اللہ تعالیٰ ایک چشم نہیں ہے۔“ ابو عبداللہ (امام بخاری رحمہ اللہ) کہتے ہیں کہ «خَسَأْتُ الْكَلْبَ» کے معنیٰ ہیں: ”میں نے کتے کو دور کیا۔“ قرآن میں ﴿خَاسِئِينَ﴾ [سورة البقرة: 65] ہے جس کے معنیٰ ہیں: ”اللہ کی رحمت سے دور کیے ہوئے۔“ [صحيح البخاري/كتاب الأدب/حدیث: 6175]