ابی بن کعب رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم جبریل علیہ السلام سے ملے تو آپ صلی ‌اللہ ‌علیہ ‌وآلہ ‌وسلم نے فرمایا: ”اے جبریل! مجھے ایک ان پڑھ امت کی طرف مبعوث کیا گیا ہے، ان میں سے کچھ بوڑھی عورتیں ہیں، کچھ بوڑھے آدمی ہیں، چھوٹے بچے اور بچیاں ہیں، اور ایسے آدمی بھی ہیں جنہوں نے کبھی کوئی کتاب نہیں پڑھی۔“ انہوں نے عرض کیا: ”اے محمد صلی ‌اللہ ‌علیہ ‌وآلہ ‌وسلم! قرآن سات لہجوں پر اتارا گیا ہے۔“ ترمذی، احمد اور ابوداؤد کی روایت میں ہے کہ آپ صلی ‌اللہ ‌علیہ ‌وآلہ ‌وسلم نے فرمایا: ”ان میں سے ہر ایک (لہجہ) شافی و کافی ہے۔“ اور نسائی کی روایت ہے کہ آپ صلی ‌اللہ ‌علیہ ‌وآلہ ‌وسلم نے فرمایا: ”جبریل و میکائیل علیہما السلام میرے پاس آئے تو جبریل علیہ السلام میرے دائیں جبکہ میکائیل علیہ السلام میرے بائیں طرف بیٹھ گئے، تو جبریل علیہ السلام نے کہا: قرآن کو ایک لہجے پر پڑھیں، میکائیل علیہ السلام نے کہا: ان سے زیادہ طلب کریں، حتیٰ کہ وہ سات لہجوں پر پہنچ گئے، اور ہر لہجہ شافی و کافی ہے۔“ [اسنادہ حسن، رواہ الترمذی و احمد و ابوداؤد والنسائی] ۔ [مشكوة المصابيح/كتاب فضائل القرآن/حدیث: 2215]