ابولحم کے آزاد کردہ غلام عمیر رضی اللہ عنہ بیان کرتے ہیں کہ میں اپنے مالکوں کے ساتھ غزوۂ خیبر میں شریک تھا، انہوں نے میرے بارے میں رسول اللہ صلی ‌اللہ ‌علیہ ‌وآلہ ‌وسلم سے بات کی اور انہوں نے آپ صلی ‌اللہ ‌علیہ ‌وآلہ ‌وسلم کو بتایا کہ میں ایک غلام ہوں، آپ صلی ‌اللہ ‌علیہ ‌وآلہ ‌وسلم نے میرے متعلق حکم فرمایا تو مجھے تلوار حمائل کی گئی اور میں اسے گھسیٹ رہا تھا، آپ صلی ‌اللہ ‌علیہ ‌وآلہ ‌وسلم نے گھریلو سامان میں سے مجھے کچھ دینے کا حکم فرمایا۔ میں نے آپ صلی ‌اللہ ‌علیہ ‌وآلہ ‌وسلم کو ایک دم سنایا جو کہ میں دیوانوں پر کیا کرتا تھا، آپ صلی ‌اللہ ‌علیہ ‌وآلہ ‌وسلم نے اس میں سے کچھ الفاظ ترک کر دینے اور کچھ رکھ لینے کا حکم دیا۔ (ترمذی، ابوداؤد، البتہ ابوداؤد کی روایت لفظ «متاع» پر ختم ہو جاتی ہے۔ اسنادہ صحیح، رواہ الترمذی وابوداؤد) [مشكوة المصابيح/كتاب الجهاد/حدیث: 4005]