ابن شہاب (زہری رحمہ اللہ) سے روایت ہے کہ عمر بن عبدالعزیز رحمہ اللہ نے نمازِ عصر میں کچھ تاخیر کی تو عروہ (بن زبیر رحمہ اللہ) نے انہیں کہا: آگاہ رہو کہ جبریل علیہ السلام تشریف لائے تو انہوں نے رسول اللہ صلی ‌اللہ ‌علیہ ‌وآلہ ‌وسلم کے آگے نماز پڑھی، تو عمر رحمہ اللہ نے فرمایا: عروہ! تمہیں معلوم ہونا چاہیے کہ تم کیا کہہ رہے ہو، انہوں نے کہا: میں نے بشیر بن ابی مسعود رحمہ اللہ کو بیان کرتے ہوئے سنا، انہوں نے کہا: میں نے ابومسعود رضی اللہ عنہ سے سنا وہ بیان کرتے ہیں کہ میں نے رسول اللہ صلی ‌اللہ ‌علیہ ‌وآلہ ‌وسلم کو فرماتے ہوئے سنا: ”جبریل علیہ السلام تشریف لائے تو انہوں نے میری امامت کرائی، تو میں نے ان کے ساتھ نماز پڑھی، پھر میں نے ان کے ساتھ (دوسری) نماز پڑھی، پھر میں نے ان کے ساتھ نماز پڑھی، پھر میں نے ان کے ساتھ نماز پڑھی، پھر میں نے ان کے ساتھ نماز پڑھی۔“ یوں پانچ دفعہ اپنی انگلیوں پر شمار کیا۔ متفق علیہ۔ [مشكوة المصابيح/كتاب الصلاة/حدیث: 584]