انس رضی اللہ عنہ بیان کرتے ہیں کہ جب ابوسفیان کی آمد کا ہمیں پتہ چلا تو رسول اللہ صلی ‌اللہ ‌علیہ ‌وآلہ ‌وسلم نے مشورہ کیا، تو سعد بن عبادہ رضی اللہ عنہ کھڑے ہوئے اور عرض کیا: اے اللہ کے رسول! اس ذات کی قسم جس کے ہاتھ میں میری جان ہے! اگر آپ ہمیں سمندر میں کود جانے کا حکم فرمائیں گے تو ہم اس میں ضرور کود جائیں گے، اور اگر آپ ہمیں بَرکِ غِماد تک جانے کا حکم فرمائیں گے تو ہم وہاں تک بھی پہنچیں گے۔ راوی بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم نے لوگوں کو بلایا، پھر کوچ کیا حتیٰ کہ بدر کے مقام پر پڑاؤ ڈالا۔ رسول اللہ صلی ‌اللہ ‌علیہ ‌وآلہ ‌وسلم نے فرمایا: ”یہاں فلاں قتل ہو گا“ اور آپ صلی ‌اللہ ‌علیہ ‌وآلہ ‌وسلم اپنے دستِ مبارک سے زمین پر نشان لگا رہے تھے: ”یہاں اور یہاں“۔ راوی بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم کے نشان کی جگہ سے کوئی بھی آگے پیچھے قتل نہیں ہوا تھا۔ اسے مسلم نے روایت کیا ہے۔ [مشكوة المصابيح/كتاب الفضائل والشمائل/حدیث: 5871]