ابوامامہ رضی اللہ عنہ بیان کرتے ہیں کہ کسی یہودی عالم نے نبی صلی ‌اللہ ‌علیہ ‌وآلہ ‌وسلم سے سوال کیا: کون سا قطعہ زمین بہتر ہے؟ آپ صلی ‌اللہ ‌علیہ ‌وآلہ ‌وسلم خاموش ہو گئے اور فرمایا: ”میں جبریل علیہ السلام کے آنے تک خاموش رہوں گا۔“ آپ صلی ‌اللہ ‌علیہ ‌وآلہ ‌وسلم خاموش رہے اور جب جبریل علیہ السلام آئے تو آپ صلی ‌اللہ ‌علیہ ‌وآلہ ‌وسلم نے دریافت کیا تو انہوں نے کہا: اس بارے میں مسؤول، سائل سے زیادہ نہیں جانتا، لیکن میں اپنے رب تبارک و تعالیٰ سے دریافت کروں گا، پھر جبریل علیہ السلام نے فرمایا: محمد صلی ‌اللہ ‌علیہ ‌وآلہ ‌وسلم! میں اللہ کے اتنا قریب ہوا کہ میں اس سے پہلے کبھی اتنا قریب نہیں ہوا، آپ صلی ‌اللہ ‌علیہ ‌وآلہ ‌وسلم نے پوچھا: ”جبریل! وہ (قریب ہونا) کیسے تھا؟“ انہوں نے فرمایا: میرے اور اس کے مابین نور کے ستر ہزار پردے تھے، اللہ تعالیٰ نے فرمایا: ”بدترین مقامات بازار اور بہترین مقامات مساجد ہیں۔“ «لَا أَصْلَ لَهُ بِهَذَا اللَّفْظِ، لَمْ أَجِدْهُ عَنْ أَبِي أُمَامَةَ رَضِيَ اللَّهُ عَنْهُ» ”اس لفظ کے ساتھ اس کی کوئی اصل نہیں، میں نے اسے ابوامامہ رضی اللہ عنہ سے نہیں پایا۔“ [مشكوة المصابيح/كتاب الصلاة/حدیث: 741]