ابوحمید ساعدی رضی اللہ عنہ نے رسول اللہ صلی ‌اللہ ‌علیہ ‌وآلہ ‌وسلم کے صحابہ رضی اللہ عنہم کی ایک جماعت میں فرمایا: میں رسول اللہ صلی ‌اللہ ‌علیہ ‌وآلہ ‌وسلم کی نماز کے متعلق تم سب سے زیادہ جانتا ہوں، میں نے آپ صلی ‌اللہ ‌علیہ ‌وآلہ ‌وسلم کو دیکھا، جب آپ صلی ‌اللہ ‌علیہ ‌وآلہ ‌وسلم نے «اللهُ أَكْبَرُ» ”اللہ سب سے بڑا ہے“ کہا تو اپنے ہاتھ کندھوں کے برابر کر لیے، جب آپ صلی ‌اللہ ‌علیہ ‌وآلہ ‌وسلم نے رکوع کیا تو اپنے ہاتھ گھٹنوں پر رکھے، پھر اپنی کمر کو جھکایا، جب رکوع سے سر اٹھایا تو بالکل سیدھے کھڑے ہو گئے حتیٰ کہ ہر ہڈی اپنی جگہ پر آگئی، جب سجدہ کیا تو آپ صلی ‌اللہ ‌علیہ ‌وآلہ ‌وسلم نے ہاتھ رکھے جو کہ بچھے ہوئے تھے نہ سمٹے ہوئے تھے اور آپ صلی ‌اللہ ‌علیہ ‌وآلہ ‌وسلم نے پاؤں کی انگلیوں کے کناروں کو قبلہ کی طرف کیا تھا، جب آپ صلی ‌اللہ ‌علیہ ‌وآلہ ‌وسلم دو رکعتوں میں بیٹھے تو آپ صلی ‌اللہ ‌علیہ ‌وآلہ ‌وسلم اپنے بائیں پاؤں پر بیٹھے اور دائیں پاؤں کو کھڑا کیا، اور جب آخری رکعت میں بیٹھے تو بائیں پاؤں کو آگے بڑھا کر سرین پر بیٹھ گئے اور دائیں پاؤں کو کھڑا کیا۔ رواہ البخاری۔ [مشكوة المصابيح/كتاب الصلاة/حدیث: 792]